Fakultetsråd for Fakultet for ingeniør- og naturvitskap (FIN)

Fakultetsrådet skal ta del i drøfting av, og gje råd i, overordna saker som dekan legg fram. Rådet kan på eige initiativ også løfte fram saker det finn å vere av strategisk eller prinsipiell karakter. 

Fakultetsrådet skal sikre at sentrale og strategiske avgjerder i fakultetet har tilgang på god erfaringsbasert og fagleg kunnskap. Medlemene er ikkje representantar for særinteresser, men skal med utgangspunkt i gode prosessar og felles mål ha heilskapen som rettesnor.

Fakultetsrådet skal drøfte og gje dekanen råd i: 

• mål og strategiar for fakultetet sin sentrale utdannings- og forskingsaktivitet, og anna aktivitet som følgjer av samfunnsoppdraget
• fagleg prioritering og dimensjonering med utgangspunkt i mål, ressursgrunnlag av økonomisk eller kompetansemessig art, og utviklingstrekk i sektor og relevante samfunnsområde
• samhandling med samfunns- og næringsliv, fakultetet si rolle som leverandør av kunnskap og kandidatar, og som aktiv deltakar i samfunnsdebatten
• verksemdstyring, langsiktig kvalitets-, plan- og budsjettarbeid
• oppfølging av prioriterte satsingar i strategiplanen
• vesentlege endringar i organisasjonsdesign for fakultetet
• saker der HVL-styret eller rektor eksplisitt ønskjer fakultetsrådet sine vurderingar

Fakultetsrådet skal haldast informert om verksemda i fakultetet gjennom:

• årsrapport og årsrekneskap og andre relevante periodiske institusjonelle rapportar knytt til systematisk verksemdstyring
• årsrapportar og andre relevante periodiske rapportar knytt til fakultetet si verksemd
• samandrag frå styringsdialog med leiinga ved høgskulen
• nasjonale og institusjonelle målingar av omdømme, kvalitet og kandidatetterspurnad, og andre dokument som er særleg viktige for rådet sitt høve til å ta del i strategiske spørsmål

Rådet si funksjonstid er fire år og følgjer dekanperioden. Det skal haldast minimum eitt rådsmøte i semesteret.