Forskinga bør skje der verksemdene er
Bidrar sentralisering av norske forskingsmidlar til lågare FoU-aktivitet i privat sektor? Må verkemidla flyttast nærare der bedriftene faktisk er? Under Arendalsuka tok HVL debatten om korleis forsking på kunstig intelligens kan styrkast.
Mange peikar på at det er eit problem at norske bedrifter brukar lite ressursar på forsking på kunstig intelligens. Samtidig er det kjent at bedrifter i hovudsak finansierer forsking i regionen dei er etablert i.
Rektor ved HVL Gunnar Yttri har tidlegare etterlyst det regionale forskingsperspektivet i regjeringa sitt nye forskingssystem, den såkalla Systemeldinga.
Under Arendalsuka deltok KI-forskar ved HVL Reza Arghandeh, sjefsforskar i Norce Roger Normann og produktsjef i Tryg Forsikring Abhishek Shah i debatten.
– Nærleik betyr noko
Stortinget har gitt over ein milliard kroner til forsking på kunstig intelligens, men ein stor del av denne finansieringa er konsentrert i Oslo og Trondheim. Samtidig er dei regionale forskingsfonda er lagt ned.
Deltakarane i debatten var einige om at det trengst meir KI-forsking, men at det må forskast saman med privat og offentleg sektor i heile landet, og at det trengst verkemiddel som stimulerer til dette.
Sjefsforskar i NORCE Roger Normann har over 25 års erfaring med oppdragsforsking innan regional innovasjon. Han peika på at geografisk nærleik er viktig for samarbeid mellom næringsliv og akademia.
– Nærleiken i sosiale relasjonar betyr noko i innovasjon- og utviklingsarbeid, sa Normann.
Treng verkemiddel som stimulerer til samarbeid
HVL-professor Reza Arghandeh viste til KI-prosjekt innan klimarisiko som skred, brann og overvaking av kraftlinjer som døme på forsking som skjer i og for regionen. Men han etterlyste også sterkare politisk satsing på regionalt forskingssamarbeid mellom næringsliv og akademia.
– Politikarane må forstå at vi treng betre infrastruktur for forskingssamarbeid med private bedrifter. Den infrastrukturen manglar vi i dag, poengterte HVL-professoren.
Professor Reza Arghandeh har mellom anna forska på korleis kunstig intelligens kan nyttast til å overvake vegatasjonen langs kraftlinjene ved bruk av satelittar. Foto: Ingvild Festervoll Melien.
