Vidarefører avstandskrav i undervising ved campus Bergen
HVL forlengjer avstandskravet i undervisinga i Bergen fram til og med sundag 19. september.
Do you prefer to read this article in English?
– Vi ser an smittesituasjonen og ventar litt til før vi opnar for meir fysisk undervising på campusen vår i Bergen, seier rektor Gunnar Yttri.
Han ber studentar og tilsette merke seg:
- Med avstandskrav i undervisinga vil vi ha mindre undervisingsareal på campus. Studentane i Bergen vil ha ein kombinasjon av fysisk og digital undervising framover. Hugs å orientere deg i timeplanen og Canvas.
- For dei fire andre campusane ved HVL vil det framleis vere høve til å fråvike avstandskravet i undervisningssituasjonar.
- Mange HVL-studentar er no fullvaksinerte. Er du ikkje fullvaksinert bør du nytte tilbodet om vaksinasjon (drop-in eller timebestilling) i kommunen der du studerer. Du finn god informasjon på kommunen si nettside. Vaksinen beskyttar og gjer at vi kan opne samfunnet meir.
- Tilbodet om hurtigtest/sjølvtest vil bli utfasa ved alle fem campusar ved HVL i tida framover. Dette var ei ordning som i første rekke var knytt til studiestart og fadderveker.
Yttri fortel at høgskulen i midten av neste veke vil vurdere avstandskravet for undervisinga ved campus Bergen på nytt.
– Vi ønskjer å gi studentar og tilsette god informasjon så tidleg som mogleg. Føreseielegheit er viktig.
– Vi vonar at vi frå måndag 20. september kan fjerne avstandskravet i undervisningssituasjonar også i Bergen. Vi kjem med oppdatert informasjon om dette i neste veke.
– Eg vil òg nemne at vi har jamleg kontakt med smittvernstenesta i kommunen og andre universitet og høgskular for å finne gode tiltak og løysingar i lag.