Kvalitet i studieprogram

Alle studieprogram på bachelor- og masternivå skal knytast til eit studieprogramråd som har ansvar for forbetring og utvikling av studieprogrammet.

For campusovergripande studieprogram, skal dekanen sikre at det finst kontaktpunkt for studentar og tilsette på alle campus.

Les meir om studieprogramråd ved HVL her

Studieprogramansvarleg har ansvar for at studentane vel studenttillitsvalde og vararepresentantar for desse på alle kull. Har eit studieprogram fleire studiestader, skal det veljast éin studenttillitsvald per kull på alle studiestadene.

Alle dei studenttillitsvalde høyrer til eit av studentråda ved Høgskulen på Vestlandet, medan utvalde studenttillitsvalde representerer studentane i studieprogramrådet.

I starten av studieprogrammet kan ein også gjennomføre samling for studentane med forventningsavklaring, opplæring i systemet for kvalitet, og aktivitetar for at studentane, faglærarar og studieprogramleiing blir kjent.

Les meir om klassetillitsvalde si rolle i kvalitetsarbeidet her.

Studieprogramansvarleg skal kvart studieår leggje fram ei sak for studieprogramrådet, som skal bestemme korleis dei ulike emna skal vurderast og evaluerast. Saka skal innehalde følgjande vurderingar:

• Rulleringsplan for anonyme undersøkingar
• Rulleringsplan for ekstern sensur
• For studium med praksis: krav til førebuing, avtalar, vurdering og oppfølging av praksis
• Vurdering av om det er behov for særskilt oppfølging på enkeltområde med bakgrunn i resultat og tilbakemeldingar frå studentar, fagtilsette og arbeidsliv/praksisfelt.

Les meir om kvalitet i emne her. 

Alle emne- og studieplanar skal vere i tråd med HVL sine malar, og godkjennast av dekan.

Utdanningsutvalet ved HVL har vedteke ein rettleiar for studie- og emneplanar ved HVL , med eit eige vedlegg om vurdering og kriterium for bruk av obigatoriske læringsaktivitetar.

Når studieplan skal reviderast, skal studentar, tilsette og representantar frå praksisfelt/arbeidsliv høyrast og involverast. Medverknad er studieprogramansvarleg sitt ansvar, og skjer via Studieprogramrådet.

Utdanningsutvalet har vedtatt ein overordna prosesskildring som syner fristar og ansvar for årleg revisjon av studie-og emneplanar. Utdanningsutvalet har og vedtatt ein oversikt over kva som vert rekna som vesentlege endringar i studieprogram, og kva funksjon som har myndigheit til å vedta desse endringane. 

Dersom revisjonen medfører endringar som må godkjennast av Utdanningsutvalet, må fakultet sende søknadsskjema innan 15.september kvart år.

Meir informasjon om prosess og malar ligg i Sharepoint.

Tilbakemeldingar via studentundersøkingar er viktige for å få informasjon om korleis studentane trivst og korleis dei opplevde utbyttet av læringa. Høg svarprosent er naudsynt for å kunne nytte kunnskapen som kjem fram.

Studiebarometeret (til studentar i 2. og 5. studieår) og SHOT-undersøkinga (kvart fjerde år) er nasjonale undersøkingar. I tillegg gjennomfører HVL undersøkingar retta mot alle søkjarar og nye studentar, ei studentundersøking siste semester på alle bachelorstudium, samt kandidatundersøking annankvart år (i samarbeid studentsamskipnaden, UiB og NHH).

I tråd med rulleringsplan blir det også gjennomført anonyme undersøkingar på emne-og kullnivå. Det kan vidare vere aktuelt å gjennomføre supplerande undersøkingar i samband med til dømes utvekslingsopphald eller periodiske evalueringar.

I dokumentsenteret finn du malar for vurdering og oppfølging av studiebarometeret

Studieprogramansvarleg, instituttleiing og fakultetsleiing har gjennom studieåret tilgang på ei rekke data knytt til ulike delar av læringsbanen til studentane ved studieprogrammet:

• Dokumentasjon frå system frå arbeid med kvalitet på emne- og studieprogramnivå, irekna resultat frå student- og kandidatundersøkingar, emnerapportar/referat frå dialogmøte med emneansvarlege og periodiske evalueringar.

• Datagrunnlag, vurderingar og handsaming knytt til:

  • Rekruttering, opptak og studiestart
  • Opplevd kvalitet
  • Resultat og gjennomstrøyming
  • Internasjonalisering
  • Fagmiljø
  • Praksis
  • Læringsmiljø
  • Relevans

Studieprogramansvarleg har ansvar for å følgje opp dokumentasjonen frå det systematiske arbeidet med kvalitet og data på studieprogramnivå gjennom å:

• legge fram saker for studieprogramrådet og andre relevante forum med drøfting av behovfor tiltak og effekten av desse,
• gjennomføre relevante tiltak på studieprogramnivå,
• gjennomføre sjølvevaluering og delta i evalueringsmøte i samband med periodiske evalueringar,
• delta i møte med institutt- og fakultetsleiinga med vurdering av kvaliteten i studieprogrammet, 
• komme med forslag til endringar i emneplanar og studieplan og vurdere om desse er å rekne som vesentlege endringar i høve akkrediteringsgrunnlaget.

Studieprogramansvarleg har ansvar for at relevant dokumentasjon frå kvalitetsarbeidet blir lagt i Canvas og sharepoint. I tillegg kan ein velje å gjennomføre kullsamlingar for å formidle og diskutere tilbakemeldingar, tiltak og resultat med studentane.

I webrapporteringsverktyet Tableau finn du ein mal for studieprogramrapport, der du kan hente informasjon om alle studieprogram ved HVL. Alle med feide-brukar kan logge på med kortnamn@hvl.no og feide-passord.

Fagansvarleg og fakultetsleiing har tilgang til ulike data frå ph.d.- program på individ- og emnenivå. Desse vert følgt opp gjennom rapportering til relevante utval. Dette er nærare skildra i HVL sitt system for kvalitetsarbeid i ph.d.-utdanningane. 

Utdanningsutvalet har vedteke ei oversikt over kva som reknast som vesentlege endringar i studieprogram og kva funksjon som har myndigheit til å vedta desse endringane. Dersom revisjonen medfører endringar som må godkjennast av Utdanningsutvalet, må fakultet sende søknadsskjema innan 15. september kvart år. 

• Oversikt over vesentlege endringar i studieprogram (Word)
• Søknadsskjema vesentlege endringar av studieprogram over 60 sp (Word)