Stortingsrepresentant Liv Kari Eskeland (H) og lokalpolitikar Geir Angeltveit (V) delte sist veke ut 6,5 millionar kroner til tre gode campusprosjekt på HVL. I dag var det nye studieplassar og rekrutteringsstillingar det handla om. Prorektor for nærregion Stord/Haugesund, Liv Reidun Grimstvedt, tok i mot dei 181 nye studieplassane og dei 11 nye rekrutteringsstillingane på vegne av rektoratet og leiinga i HVL.
Svein Ove Eikenes
Avdelingsleiar
Høgskulen på Vestlandet

181 nye studieplassar til HVL

Regjeringa har i dag fordelt 4000 nye studieplassar til landets universitet og høgskular. HVL får 181 plassar innan helse- og sosialfag, barnehagelærarutdanning, grunnskulelærarutdanning, MNT-fag, jus og økonomi og administrasjon. I tillegg får HVL 11 nye rekrutteringsstillingar.

Denne våren har rekordmange søkt seg til høgare utdanning, og for nokre veker sidan ba Kunnskapsdepartementet landets universitet og høgskular om innspel til kor ein kan auke studentopptaket til hausten. HVL sendte inn ei oversikt som viste at høgskulen kunne auke opptaket med om lag 200 plassar.

I dag kom tildelinga frå Regjeringa. Den viser at HVL får 181 nye studieplassar med ei slik fordeling:

  • Helse- og sosialfag: 81 plassar
  • Barnehagelærar: 10 plassar
  • Grunnskulelærar: 10 plassar
  • MNT (matematikk, naturvitskap og teknologi): 20 plassar
  • Øk adm/jus: 60 plassar

- Me er i ein spesiell situasjon om dagen med stor søking til universitet og høgskular, og me er i ein krevjande situasjon i samband med korona og arbeidsledigheit.

- Utdanning er såleis viktig. Me treng god kapasitet og me må gje tilbod til fleire, seier stortingsrepresentant Liv Kari Eskeland (H) og lokalpolitikar Geir Angeltveit (V).

I dag var dei på plass i solskinet på campus Stord for å overbringe plassane.

Eskeland fortel at tildelinga frå Kunnskapsdepartementet er for eitt år.

- Ja, tildelinga er berre for i år. Det ligg ikkje opptrapping av studieplassane inne i denne tildelinga.  

- Me veit at kompetansebehova endrar seg i arbeidslivet, og difor vil me sjå dette meir på sikt, opplyser Eskeland som óg er glad for å tildele HVL 11 nye rekrutteringsstillingar.

- Desse stillingane er viktige for forskingsaktiviteten ved HVL, og dei er meint å styrkje fagmiljøa.

Rektor Berit Rokne i HVL er glad for dei nye studieplassane og rekrutteringsstillingane.

- Dette kjem godt med og me skal bruke dei godt. Det å svare på behova og kunne gje fleire av søkjarane våre eit godt studietilbod til hausten er viktig.

Ho fortel at dei nye studieplassane per i dag ikkje er fordelt til nokre av høgskulen sine fem campus.

- Me vil sjå dette i ein heilskap før me landar noko meir. Her får fakulteta våre ei viktig rolle.  

- Dei nye rekrutteringsstillingane blir og ei god styrking av forskingsmiljøa våre og arbeidet inn mot universitetsambisjonen vår.