8,4 millionar til fleksible utdanningar ved HVL
HVL får Diku-midlar til to nye fleksible utdanningar: ei som skal forbetre den juridiske kompetansen blant tilsette i helse- velferdssektoren, og ei som skal styrke den digitale kompetansen på tvers av bransjar på Vestlandet.
- Dette var ei svært gledeleg melding å få, seier instituttleiar Svanaug Fjær ved Institutt for velferd og deltaking.
Diku sitt program for fleksible utdanningstilbod fekk 109 søknader innan fristen 21. mars i år. Halvparten av prosjekta kom gjennom nålauget, og eitt av dei var altså prosjektet ved Institutt for velferd og deltaking (IVD) som fekk 5,3 millionar.
God tilbakemelding
Prosjektet som har fått midlar, har tittelen «Videreutdanning i helse- og velferdsforvaltning» og er eit samarbeidsprosjekt mellom HVL, NAV, Statsforvaltaren i Vestland, Bergen kommune og Haugesund kommune. Målet er å forbetre den generelle juskompetansen blant tilsette i helse- og velferdssektoren, og prosjektet skal gå over fire år. Diku trekk fram at prosjektet er godt strategisk forankra.
Borgtor Bøyum leiar prosjektet – han underviser i jus knytt til mellom anna barnevern, sosialt arbeid og vernepleie.
Det andre prosjektet frå HVL som har fått 3,1 millionar i Diku-midlar i denne omgangen, er «Rådgiver for digital økonomi og ledelse». Dette skal bli eit desentralisert undervisningtilbod på 60 studiepoeng, og er eit toårig samarbeid med ei lang rekke partar, mellom anna NAV og fleire regionale aktørar i Kvinnherad, Øygarden, Osterøy, Voss og Ullensvang.
Arbeidslivet treng meir digital kompetanse
- Formålet med studieprogrammet er å gjere studentane betre rusta i møte med eit arbeidsliv som stadig krev auka digital kompetanse og ein raskare endringstakt på grunn av nye teknologiar, seier Tom Skauge, instituttleiar ved Institutt for økonomi og administrasjon.
Det fleksible studieprogrammet vil innehalde emne som digital organisering og leiing, digital marknadsføring og digital forretningsforståing. I tillegg vil studentane få sjansen til å bruke dei nye kunnskapane gjennom praksisopphald i ei verksemd.
Bjørg Kristin Selvik, prorektor for utdanning, gler seg over at HVL får bygge opp fleire fleksible utdanningstilbod, noko som er ei viktig satsing for høgskulen:
- Vi har stor merksemd mot det å bygge opp tilbod innan livslang læring. Når vi lagar fleksible utdanningar, er det lettare for andre målgrupper enn dei unge heiltidsstudentane å skaffe seg viktig kompetanse, seier Selvik.