Fleire stipendiatstillingar til Sogndal

Dei fire stipendiatstillingane er knytt til doktorgradsprogrammet RESINNREG, gjennom Institutt for samfunnsvitskap (ISV) og Institutt for økonomi og administrasjon (IØA). Førebels er det stillingane ved ISV som er lyst ut, med søknadsfrist 4.mai; den eine er innan fagområdet sosiologi med eit fokus på ungdom og regional utvikling, medan den andre omfattar historie og innovasjon.

I tillegg blir det utlyst to stipendiatstillingar innan økonomi og administrasjon til Sogndal seinare i vår.

Langsiktig styrking av fagmiljøa

Tone Merete Brekke er både instituttleiar for IØA og fungerande for ISV. Ho gler seg over at fagmiljøa til fakultetet i Sogndal no skal bli styrka.

- Dette er ei satsing på campus Sogndal for å få på plass langsiktig kompetansebygging og rekruttering av nye faglege krefter. Også i lys av universitetsambisjonen til HVL, er det viktig å bygge robuste fagmiljø på alle fem campus, seier ho og legg til at det er bra å få bygd opp eit stipendiatmiljø beståande av fleire stipendiatar.

Bygger opp stipendiatmiljø

-  Stipendiatstillingane gir gode moglegheiter til personar som er tidleg i si akademiske karriere. Stillingane varer jo berre for ei periode, men det er jo kjekt om dei ønskjer å bli værande som ein del av fagmiljøet også etterpå. Det er fantastisk for oss å få på plass fleire stipendiatar på plass samtidig. Skulle vi berre hatt ein stipendiat, hadde det vore sårbart. Med to stykk blir det automatisk eit miljø og dei har kvarandre. På IØA har vi allereie ein stipendiat i Sogndal, så med to fleire blir det eit godt stipendiatmiljø, seier Brekke.

Meir informasjon om stillingane som allereie er utlyst finn du her:

Stipendiatstilling - historie og innovasjon

Stipendiatstilling - ungdom og regional utvikling