Geoparken vert internasjonal læringsarena

- Ei veldig kjekk melding å få no før sommaren, fortel Hege Myklebust i Høgskulen på Vestlandet som er prosjektleiar.

Ho seier at prosjektet «GeoSite: Geoparken som digital og lokal læringsarena» har vakse fram i tett samarbeid mellom lærarutdanningsmiljøet på campus Stord og UNESCO Geopark Sunnhordland.

- Vi har også med oss UNESCO-geoparkar i Irland, Italia og Romania. I tillegg er NettOp-eininga ved Universitetet i Stavanger som driv med utvikling av digitale læremiddel inne som partnar.

Fekk full pott

Det er gjennom EU-programmet ERASMUS+ som har utdanning, opplæring, ungdom og idrett som fagfelt at midlane er komne. 

- Dette er verdas største utdanningsprogram, og gjennom tre ulike program støttar dei mobilitet og samarbeid gjennom heile utdanningsløpet frå barnehage til høgare utdanning.

Myklebust opplyser at det var seks prosjekt i Norge som kom gjennom nålauga i årets tildelingsrunde. GeoSite var eitt av dei.

GeoPark Sunnhordland fekk nettopp UNESCO-status, og dagleg leiar Brynjar Stautland er svært nøgd med at det aller første samarbeidsprosjektet dei går inn i får full pott.

- Ein Unesco geopark si hovudoppgåve er formidling av den naturarven ein har fått statusen for. Born og unge er ei sentral målgruppe, og dette prosjektet skal visa konkrete pedagogiske arbeidsmetodar for dette oppdraget. Samarbeidet med HVL, UiS og Unescogeoparkar andre stader i verda aukar kunnskaps- og idetilfanget vårt.

- Så me er svært glade og stolte for å få ressursar til dette arbeidet! Det fortel òg at vi driv bra og med god kvalitet.

Tettare til praksisfeltet

Myklebust seier tildelinga og er viktig for lærarutdanninga.

- Gjennom dei ulike digitale læringsressursane får lærarstudentar og lærarar høve til å ta med seg elevar til ulike stader i geoparkane, og læra om og på dei ulike lokasjonane om kva rolle berggrunnen har spela for utviklinga av natur, kultur og næring opp gjennom historia. Dette knyter oss tettare til praksisfeltet.

Myklebust og Stautland fortel at geoparkane har utdanning som eitt av sine hovudsatsingsområde, og dei har dyktige fagfolk og formidlarar som når ut til mange elevar,. Ved hjelp av dei nye digitale ressursane kan dei mangedobla talet på elevar som vil få kunnskap om og kjennskap til dei geologiske lokasjonane.

Prosjekt i tre år

- Me vil utvikla slike ressursar for alle dei fire geoparkane i prosjektet, og deretter gjera dei allment tilgjengelege for andre geoparkar i det globale nettverket og publikum generelt. Å utvikla ting i lag og dele kunnskap er svært viktig, fortel Myklebust.

Arbeidet startar alt i september og skal gå føre seg i tre år framover. I løpet av perioden vil partnarane samarbeida både digitalt og fysisk, med møte i alle dei fire geoparkane, og lærarstudentane på HVL vil delta i utviklinga og utprøvinga av ressursane gjennom praksisperiodane sine.