
Gir klarsignal for K3-prosjektet og nytt bygg på campus Bergen
Regjeringa legg til rette for at tomta på Kronstad kan overførast til Vestland fylke. Dermed er eit nytt bygg for Fagskulen Vestland og Høgskulen på Vestlandet eit langt steg nærmare realisering. - Ei gladmelding. Dette styrkar HVL, Vestlandet og Noreg, seier rektor Gunnar Yttri.
Han gler seg over utviklinga av saka.
- Høgskulen på Vestlandet har behov for meir areal på campus Bergen grunna stor auke i studenttal og forskingsaktivitet. Kronstad 3-prosjektet (K3) er ei unik moglegheit til å møte eksisterande og framtidige behov innan utdanning, forsking, innovasjon og samarbeid med arbeids- og næringslivet. 
Her kjem nybygget K3 ved campus Bergen.
Sambruk og deling
Yttri peikar på at sambruk med Fagskulen Vestland gir unike moglegheiter.
- Nybygget legg til rette for sambruk med Fagskulen Vestland og Vestland fylkeskommune gjennom deling av læringsareal, auditorium, møteplassar og andre fellesfunksjonar. Det er vinn-vinn.
Han meiner eit nybygg vil vera god byutvikling i Bergen.
- Kunnskapsbyen Bergen styrkar seg. Tomta for nybygget har ei sentral plassering ved eksisterande campusinfrastruktur og kryssande bybanespor. Tilgjenge og nærleik er nøkkelfaktorar i vår tid.
Han gir ros til politikarar og samarbeidspartnarar.
- Eg vil særskilt takke politikarar lokalt, regionalt og nasjonalt for å ha funne gode løysingar. Vestland fylke er ein sterk samarbeidspart. Ein takk og til høgskulestyret vårt som har vore tydelege på denne satsinga heilt frå starten.
Opnar for meir
Prorektor for regional utvikling og nyskaping i HVL, Øyvind Midtbø Berge, understrekar at saka er viktig. Behovet for meir areal har auka dei siste åra.
- Campus Bergen er dimensjonert for om lag 7 000 studentar, medan talet på studentar i dag er over 11 300. Nær alle studentane i Bergen er campusbaserte studentar. Høgskulen opplever stort press på undervisningsrom, laboratoriefasilitetar og felles læringsareal.
- Med universitetsstatus vil vi ha behov for vidare utvikling av forskingsmiljø, forskingsinfrastruktur og areal som opnar for meir samarbeid med arbeids- og samfunnsliv.
Berge seier at det er opning for eit samarbeid med vitensenteret Vil Vite i prosjektet.
- Vi håpar å få det til. Det vil kunne styrke realfagsrekruttering og vere ein spennenda læringsarena for studentane. Det vil også opna bygget og området for mange menneske.
HVL er leigetakar
I K3-prosjektet vil Vestland fylke vere byggherre, medan HVL vil vere leigetakar. Den totale bygningsmassen er førebels stipulert til om lag 18 000 m².
HVL har signalisert eit arealbehov på 8000 m².
- Dette kan endre seg framover. No arbeider vi med å kvalitetssikre arealbehova gjennom brukargrupper, og avklaring av moglegheiter for sambruk med Fagskulen, seier Berge og understrekar:
- Eksisterande bygg på tomta er i dag i full bruk av HVL og husar utdanningar, fagmiljø og laboratorium. Grunna avgrensa teknisk levetid må bygget erstattast, og K3-prosjeket vil bli oppført på same tomt. Det kjem til å bli veldig bra.
Han seier at K3-prosjektet også vil bidra til ei meir effektiv utnytting av HVL sin samla arealportefølje.
Prorektor Øyvind Midtbø Berge, statsminister Jonas Gahr Støre, forskings- og høgare utdanningsminister Eileen Fugelsnes, fylkesvaraordfører Stian Davies og rektor Torbjørn Mjelstad ved Fagskulen Vestland.