Klarsignal for nybygg i Haugesund
Eit einstemmig høgskulestyre ga i dag grønt lys for nytt bygg ved campus Haugesund.
– Dette er ei gladsak som viser at Høgskulen på Vestlandet styrkar og utviklar verksemda si i Haugesund og regionen, seier styreleiar Arvid Hallén i HVL.
Måndag ettermiddag samla han høgskulestyret til eit ekstraordinært digitalt styremøte. Saka om nybygg og ombygging av eksisterande høgskulebygg i Haugesund stod på sakskartet i styremøte 2. mai. Då valte styret å be om meir avklaringar rundt det økonomiske. I dag blei det lagt fram for styret.
– Ei god og rett satsing
Saksutgreiinga viser at utbygginga i Haugesund vil gi ei auke i husleigekostnader, men det er og peikt på at nybygget vil styrke den faglege verksemda og gi auke i inntekter.
– Sjølv om vi står i tider med trongare økonomisk handlingsrom er styret tydeleg på at dette er ei god og rett satsing. Campusen vår i Haugesund er i god utvikling og har potensial for å auka aktiviteten.
Hallén fortel at saka om nybygg har vore arbeidd med i nærare ti år.
På veg mot universitet
– Avgjerda i dag er med på å styrke universitetsarbeidet vårt. Det gir eit positivt løft og det er mange tilsette, studentar og samarbeidspartnarar som har bidrege aktivt for å få dette realisert.
Han fortel at styret i handsaminga peikte på at satsinga i Haugesund må sjåast inn ein heilskap.
- Utvikling av alle våre fem campus er eit tema styret er oppteken av. Det same gjeld å styrke økonomien og sikra eit strategisk handlingsrom for åra som kjem. Dette er saker styret vil arbeide med utover og ta eit samla grep rundt.
Vedtaket i dagens styremøte inneber at rektor Gunnar Yttri får fullmakt til å underteikne husleigeavtale med Statsbygg for nybygg i Haugesund og ombygging av eksisterande bygg i tråd med dei økonomiske berekningane som går fram av saka.
– Det var viktig å få eit vedtak i dag slik at vi ikkje mister fart i arbeidet. Tidsplanen framover for nybygget er stram, seier Hallén.