Ny utdanningsavtale mellom HVL og Equinor
HVL og Equinor har inngått ei ny rammeavtale som gir fagarbeidarar tilbod om å vidareutdanne seg til prosessingeniørar. Programmet kan årleg ta opp inntil 40 studentar og sikrar verksemda etterspurt kompetanse.
– Høgskulen på Vestlandet har lang tradisjon for å utdanne ingeniørar. Kombinert med den sentrale plasseringa på Vestlandet, gir det eit godt utgangspunkt til å utvikle kompetanse i tett samarbeid med næringslivet.
Det seier dekan ved Fakultet for teknologi, miljø- og naturvitskap Jens Kristian Fosse. Han er svært glad for at Equnior har valt HVL som samarbeidspartnar for å vidareutdanne eigne tilsette.
Christina D. Dreetz, direktør for Equinors landanlegg i Norge, meiner avtalen er svært viktig for Equinor:
– Dette programmet er ei stor satsing for oss. Vi treng ingeniørar òg i framtida. Målet er å leggje til rette for at fagarbeidarar som er motiverte for eit vidare utdanningsløp, får moglegheit til å kombinere praktisk kunnskap og erfaring med ein ingeniørgrad i prosessteknologi. Vår erfaring er at det kan gje oss veldig gode ingeniørar. Vi ser fram til å samarbeide med HVL om denne satsinga og gler oss til første uteksaminering, kommenterer ho.
Oppstart høsten 2025
Det skreddarsydde ingeniørstudiet blir samlingsbasert med fysiske og digitale samlingar og skal kombinerast med jobb. Første kull startar opp allereie høsten 2025.
Utdanninga skal gi kunnskapar og ferdigheiter for praktisk bruk av prosesskjemifaget i industrien.
Assisterande instituttleiar for kjemi Kristin Kvamme, står i spissen for eit fagmiljø som ser fram til å ta imot dei nye studentane:
– Vi er stolte over å kunne tilby moderne fasilitetar og eit framifrå læringsmiljø til dei framtidige studentane frå Equinor. Målet vårt er å gi undervisning av høg kvalitet og bidra til at fagarbeidarane lukkast som ingeniørstudentar i prosessteknologi, seier Kvamme.
Fagmiljøet ved gler seg til å ta imot nye studentar frå Equinor. Her er dei på eitt av høgskulen sine moderne laboratorium ved campus Bergen. Frå venstre: Jarle Sidney Diesen, Kristin Kvamme, Jone Totland og Anne Kamilla Diesen Hosfeld.
Utdanninga er utvikla av kjemimiljøet ved Institutt for sikkerheit, kjemi- og bioingeniørfag i samarbeid med Institutt for datateknologi, elektroteknologi og realfag og Institutt for maskin- og maritime studium.
Rammeavtalen er på 4 år, med opsjon på 2 + 2 år.
