Nye etter- og vidareutdanningar innan kunstig intelligens, robotikk, solkraft, bygg og industri

Bransjeprogramma er kurspakkar som er skreddarsydde for behova i bransjane.

– Å utvikle kompetanse i tett samarbeid med arbeidslivet står sentralt i HVL sin profil. Kursa vil skal tilby er innan område der vi har sterk fagleg ekspertise, seier prodekan for innovasjon og regional utvikling Øyvind Midtbø Berge.  

Nett- og samlingsbaserte utdanningar

Det er Direktoratet for høgare utdanning og kompetanse (HK-dir), som forvaltar ordninga med bransjeprogram. HK-dir har tildelt Høgskulen på Vestlandet rundt 8 millionar kroner til å opprette fire nye kurspakkar:

• Kurspakke for solkraftbransjen
• Berekraft i byggenæringa
• Smart industri: Frå data til verdiskaping ved bruk av kunstig intelligens
• Robotisering av produksjon – Industriell robotikk

Kursa er gratis, nett- og samlingsbaserte, og kan kombinerast med jobb.

HVL har hatt eksterne samarbeidspartnarar med i prosessen. Dei skal ta del i utviklinga av alle dei fire kurspakkane, slik at tilbodet blir best mogleg tilpassa komptansebehova i verksemdene.

Gir kompetanse til å meistre nye oppgåver

– Bransjeprogramma er eit spleiselag. Staten gir tilskot til fagskular, høgskular, universitet og andre kurstilbydarar som utvikle og drifte relevante tilbod. Verksemdene og den einskilde tilsette investerer si tid, seier direktør i HK-dir, Sveinung Skule i ei pressemelding frå Kunnskapsdepartementet.

Målet er at tilsette, permitterte og ledige i bransjar med særleg behov for endring får nødvendig kompetanse til å meistre nye oppgåver, og dermed blir i jobben.

Dei nye kursa ved HVL får oppstart våren 2026. Unntaket er kurset smart industri og kunstig intelligens som etter planen kan få oppstart allereie høsten 2025.