Oppdatert universitetssøknad til NOKUT

I oversendingsbrevet skriv rektor Gunnar Yttri:

Høgskulen på Vestlandet sender med dette vår oppdaterte søknad om å verta akkreditert som universitet. Vår opphavlege søknad, levert NOKUT i juni 2024, er oppdatert og samsvarar no med den nye universitets- og høgskuleforskrifta av 1. august 2024. 

Med tida som har gått frå søknaden vart levert og fram til september 2025, har HVL også nytta høvet til å oppdatera søknaden med tilgjengelege relevante tal og data frå 2024.  På same vis som søknaden som vart levert i juni 2024, er den oppdaterte søknaden delt inn i 11 kapittel og vedlegga er samla i eit eige dokument.

Å få akkreditering som universitet er særs viktig for HVL og for samfunnet ikring. Det komande Universitet på Vestlandet vil bidra til: 

• Auka kvalitet og kapasitet i utdanning, forsking og nyskaping.
• Auka attraktivitet for studentar og tilsette.
• Auka konkurransekraft.
• Auka innverknad og samspel regionalt, nasjonalt og internasjonalt. 

Her finn du den oppdaterte universitetssøknaden

NOKUT er no i gang med å få på plass sakkunnige til hovudkomité og faggrupper til vurdering av søknaden. I brev frå  NOKUT til HVL av 28. mai er følgjande sakshandsaming og tidslinje skissert:

• Vår 2026 : Dei sakkunnige vitjar HVL
• Tidleg haust 2026: Rapport og tilråding frå dei sakkunnige ligg føre.
• Innan utgangen av 2026: Vedtak i NOKUT-styret

No når HVL har levert den oppdaterte universitetssøknaden, er det venta at NOKUT kjem tilbake med ei nærare avklaring for vidare framdrift og organisering av sakshandsaminga.