Haustens første styremøte gjennomført

Styreleiar Arvid Hallén seier møtet  gjekk inn på fleire viktige saksområde som styret vil få igjen seinare i haust.

– Fleire av sakene vi handsama rører ved dei viktige spørsmåla knytt til utvikling av studieportefølje, dimensjonering og budsjett.  Departementet sin «styringsdialog» og tildelingsbrevet set rammene for høgskulen si vidare utvikling, og det var viktig for styret å drøfte dette tidleg på hausten.

Hallén seier at møtet er verdifullt for at styret vert oppdatert på andre viktig saker i og rundt høgskulen.

Medverknad, leiarskifte og studentombodrapport

Her kunne rektor Gunnar Yttri orientere styret om både arbeid med medverknad, ny HVL-leiing og leiarskifte, den føreståande vitjinga i samband med NOKUT sitt tilsyn med HVL sitt kvalitetssystem, og at HVL har sendt oppdatert universitetssøknad til NOKUT.

I det digitale styremøtet fekk styret også ei brei orientering frå prorektor utdanning Anne-Grethe Naustdal om korleis høgskulen arbeider systematisk med oppfølging av områda som studentombodet peikte på i sin årsrapport frå i fjor.

Rapporten som vart lagt fram i mars, peika på fleire område knytt til korleis studentane opplever HVL, og styret ville ha rektor si vurdering av desse spørsmåla og korleis høgskulen arbeider med dei.

–  Saksgrunnlaget og presentasjonen, samt diskusjonen i styremøtet, der studentombodet var invitert til å delta, viser at det er gjort eit godt arbeid i denne saka, og styret gav støtte til det vidare arbeidet med problemstillingane.

• Oppfølging av studentombodet sin årsrapport 2024
• Tilbakemelding på årsrapport frå Studenttinget

6500 nye studentar har møtt ved HVL

Førebels status for studentopptaket hausten 2025 blei og presentert for styret. Tala viser at 6500 nye studentar har møtt ved HVL i haust, på grunnutdanningar, masterutdanningar og etter- og vidareutdanningar.

Til neste styremøtet i Bergen 22.-23. oktober vil styret handsame ein meir utfyllande opptaksrapport.