Fleksibiliteten i studiet, og det at familien kan bu der dei vil, var ein viktig grunn til at Magnus Heggestad Skjerven valde samlingsbasert grunnskulelærarutdanning. 

– Vi kjenner oss veldig heldige for at eg har denne moglegheita til å bli lærar, samstundes som eg får tid og rom til familien.

Lever draumelivet på landet

Namn: Magnus Heggestad Skjerven
Studerer: Grunnskulelærar 1.–7. trinn nett- og samlingsbasert
Campus: Sogndal

Vestlandsidyll 

Saman med sambuar og barn flytta Magnus nyleg til eit gardstun utanfor Lærdal – omkransa av høge fjell og med utsikt mot fjorden. Delar av tv-serien Mord i Sogn vart filma rett ved der dei bur, og dei trivst godt med å bu så landleg. 

– Vi ville bu tett på naturen, på ein stad der vi, ungane og hunden kan vere mykje ute, langt unna bilar og bråk, fortel Magnus. 

Balanse mellom studium og liv 

Grunnskulelærarutdanninga Magnus tar, er nett- og samlingsbasert, med vekentleg nettundervisning og tre fysiske samlingar i semesteret. At studiet er organisert på denne måten, gir moglegheiter og rom til å få ein god balanse mellom liv og studium – noko Magnus set stor pris på. 

– Eg har god tid til å ete frukost saman med familien før eg set meg ned for å ha nettundervisning. Og om dottera mi skulle finne på å krype forbi i bakgrunnen, er ikkje det noko farleg heller, ler han. 

Draumen til Magnus er å vere lærar og ha eit småbruk. 

 

Ikkje lett å vite kva ein vil bli

For Magnus, som for mange andre, var det vanskeleg å vite heilt kva han ville då han skulle byrje å studere. Han var innom fleire studium og jobbar, men fann ikkje noko han verkeleg treivst med eller følte at han meistra. No har han funne det rette. 

– Fleire rundt meg, blant anna ein av dei beste venene mine, meinte at eg ville passe godt som lærar. Det var først i praksis – som er den kjekkaste delen av studiet – at eg verkeleg forstod at dette er noko eg både er god på og likar. 

Det skjønte han særleg godt då ein av lærarane på praksisskulen sa: «No har du treft.» 

– Det var ei veldig fin tilbakemelding å få, særleg etter at eg hadde prøvd så mykje forskjellig og vore usikker så lenge, seier Magnus. 
 

Tid og rom til eit godt liv

Når dei ser tilbake, er sambuarparet glade for at dei undervegs har stoppa opp og stilt spørsmål ved korleis dei kan få det livet dei ønskjer seg. Det var òg difor valet fall på nett- og samlingsbasert grunnskulelærarutdanning. Utdanninga gir Magnus meir tid heime. 

– Vi er i ein fase av livet der det å vere saman og ha tid til barna våre betyr mykje, og denne utdanninga gir oss moglegheit til nettopp det, fortel sambuar Emma Espedal.
 
Ho tar ein bachelor i barnevern ved HVL, men er for tida i permisjon saman med veslejenta Millie på ni månader. Både ho og Magnus hugsar godt den tida då dei hadde mykje mindre tid til kvarandre, og dei er takksame for at kvardagen er annleis no.
 
– Vi kjenner oss veldig heldige for at eg har denne moglegheita til å bli lærar, samstundes som eg får tid og rom til familien, seier Magnus. 
 
Tekst: Tora Myklebust Optun 
Foto: Anders Løbø Navarsete