Jorunn Simonsen Thingnes har fått kongens gullmedalje

Hans Majestet Kongens gullmedalje blir delt ut kvart år til «en fremragende, yngre forsker for et vitenskapelig arbeid bedømt ved Universitetet i Oslo. Arbeidet må være anerkjent som et virksomt bidrag til fagfeltets forskningslitteratur».

Korleis var det å få beskjeden om at du hadde fått denne utmerkinga?

– Det var litt surrealistisk å få beskjed om at eg skulle få gullmedalje av kongen. Men eg blei utruleg glad og stolt. Det er særleg kjekt fordi doktorgradsavhandlinga mi primært er skriven på norsk, og at det blir anerkjent og sett pris på. Og så er det veldig kjekt at temaet vert løfta fram som viktig, seier Jorunn Simonsen Thingnes.

Jorunn Simonsen Thingnes får blomar frå dekan Asle Holthe under ei markering på FLKI.

Har undersøkt bruken av nynorsk og samisk

Thingnes disputerte hausten 2020 ved Universitetet i Oslo med doktorgradsavhandlinga Å velje minoriserte språk. Språkpolitikk og språkval i akademia.

– I avhandlinga tar eg for meg vilkåra for å velje mindre brukte språk i akademia. Både sjølve valet av språka, men også vilkåra for å bruke dei, seier ho.

Thingnes har undersøkt bruken av samisk og nynorsk som minoriserte språk høvesvis ved Sámi allaskuvla (Samisk høgskule) og Høgskulen på Vestlandet.

– Tradisjonen for å forske på nynorsk er ganske sterk, og mange ser på Noreg som eit spennande «språkpolitisk laboratorium». Det som er nytt i avhandlinga mi, er at eg har sett på både nynorsk og samisk i det same forskingsprosjektet. Eg har også vore «ute i felten» og observert pågåande språkpolitiske prosessar. Eg har altså gjort ein språkpolitisk etnografi, ikkje ein tekstanalyse, seier ho.

Forskar på nynorsk i barnehagen

Etter å ha fullført doktorgraden ved Universitetet i Oslo har Thingnes blitt tilsett som førsteamanuensis i norsk ved HVL, med kontorstad på campus Sogndal.

– For meg som nynorskbrukar er det kjekt å kome til Høgskulen på Vestlandet, der nynorsk er i bruk på alle område. Men også her har vi ein jobb å gjere, til dømes med å sørge for at lærarstudentane våre blir gode i nynorsk. HVL får mykje velfortent skryt for språkpolitikken, men ein kan alltid bli enda betre, seier ho.

Kva jobbar du med/forskar du på ved HVL?

– Eg er utdanna norsklærar, og framover skal eg jobbe meir inn mot skule og barnehage. Nett no arbeider eg med forskingsprosjektet Multilektal skrivekunne i opplæringa. Vi skal mellom anna granske korleis språkmiljøet i barnehagen førebur born for tileigning av nynorsk som mindre brukt språk, og korleis ein målretta kan stimulere denne tileigninga, seier Thingnes.