HVL får studieplassar til maskinoffisersutdanning

- Ei gledeleg melding å få når vi i dag opnar nybygget vårt i Haugesund, seier rektor Gunnar Yttri. 

HVL har lange tradisjonar med maritim utdanning i Haugesund og eit godt samarbeid med den maritime næringa. Det er eit stort behov for maskinoffiserar og både høgskule og næringa har arbeidd over tid med å få tildelt studieplassar til utdanninga.

Budsjettlekkasjen som blei kunngjort i Haugesund i dag er viktig.

Styrkar den maritime utdanningskjeda i regionen

– Høgskulen har utvikla fag-, og forskingsmiljø over fleire år og 30 nye studieplassar til maskinoffisersutdanning vil bidra godt i den vidare utviklinga, seier rektor Yttri.

– Satsinga på maskinoffisersutdanning styrkar campusen vår og heile den maritime utdanningskjeda i regionen.

Forskings- og høgare utdanningsminister Eileen Fugelsnes tykte det var hyggjeleg å dele ut studieplassar i samband med opninga av nybygget.

– Å kunngjere dette i dag er veldig kjekt. Opning av nytt bygg og maritim veke gjer dette spesielt fint.

Fiskeri- og havminister Marianne Sivertsen Næss smilte også under pressekonferansen i nybygget.

– Vi treng nok og riktig kompetanse i tida framover. Med desse studieplassane vil vi styrke den maritime næringa og høgskulen.

Lange røter for maritim utdanning i Haugesund

Dekan Jens Kristian Fosse ved Fakultet for teknologi, miljø- og samfunnsvitskap viste til dei lange røtene for maritim utdanning i Haugesund.

- I 2024 markerte vi 150 år med maritim utdanning i Haugesund. Nye studieplassar er viktig for vidare utvikling og det er stor stas. Vi er utruleg glade for tildelinga.