Geofaredagen 2023
Velkomen til konferansen Geofaredagen i Sogndal, 19. - 20. oktober 2023.
Campus Sogndal, Fossbygget Rom:300 Sognefjorden. Finn fram i MazeMap!
Me inviterer til årets Geofaredag i Sogndal!
19.oktober: Geofaredagen på Høgskulen på Vestlandet Campus Sogndal
20.oktober: Ekskursjon: Geofarar på Vestlandet
Geofaredagen i 2023 vert arrangert av Instituttet for miljø- og naturvitskap på Høgskulen på Vestlandet og er eit gratis arrangement!
Kva er Geofaredagen?
Geofaredagen er ein møtestad for studentar, forskarar og andre som jobbar med geofarar i Noreg. Her skal ny og pågåande forsking presenterast. Geofaredagen har søkelys på studentar og deira arbeid, og er også eit viktig forum for geo-bransjen til å møta og rekruttera nye og motiverte medarbeidarar.
Geofaredagen, inklusive ekskursjonen er gratis for alle deltakarar. Studentar som deltek og presenterer arbeidet sitt kan i tillegg søkje om reisestønad.
Språket på konferansen er norsk, men bidrag på engelsk er også velkomne.
Dette byr Geofaredagen på:
- Lågterskelkonferanse for studentar som arbeider med geofare-problemstillingar i bachelorgrad, mastergrad eller doktorgrad, eller som nettopp har avslutta studiet
- Interessante og aktuelle keynote-føredrag
- Spennande ekskursjon om geofarar på Vestlandet
- For studentar: Ein sjanse til å knyte kontaktar med fagfolk frå offentlege etatar, konsulentar og andre som jobbar med geofare
- For erfarne fagfolk: Ein sjanse til å rekruttere neste generasjon med geofareforskarar og få innblikk i deira arbeid og interesser
Geofarar i Norge
I det siste står spesielt ekstremvêr i fokus som ein utløysande faktor for ulike typar geofarar. Flaum, skred, skog- og lyngbrann, eller stormar har ofte dramatiske konsekvensar for menneskeliv, miljø og økonomiske verdiar. Desse konsekvensane er i mange tilfelle forverra av menneskeleg aktivitet.
På konferansen forstår me ”geofarar” som eit bredt omgrep som også inkluderer jordskjelv, vulkanutbrot, flaum, skred og tsunamiar og andre prosesser som uavhengig av ekstremvêr kan vera ein risiko for menneske.
Kunnskap om desse prosessane er avgjerande for korleis samfunnet kan redusere risikoen frå geofarar gjennom å førebyggja og tilpassa plasseringa av bygningar og infrastruktur i langsiktige arealplanar.