Kvalitet i studieportefølje

Overordna prinsipp for strategisk utvikling av studieporteføljen

I sak 24/23 vedtok høgskulestyret fem overordna prinsipp for strategisk utvikling av studieporteføljen i perioden 2023-2030.

Dette dannar grunnlaget for både fakulteta og styret sine evalueringar og vidareutvikling av den samla studieporteføljen.

Prinsipp for utvikling av studieporteføljen ved HVL:

A. Framskrivingar om kompetansebehov i nasjonalt og regionalt arbeidsliv skal ligge til grunn for utvikling av studieporteføljen

B. Utviklinga av studieporteføljen er avgjerande for at alle campusane skal styrkje seg som attraktive studiestader. Fakulteta skal, i samarbeid på campus, men også på tvers av campus, utvikle studietilbod som er etterspurt av studentar og arbeidsliv 

C. Studieporteføljen skal vere økonomisk berekraftig

D. Studieporteføljen skal vere kjenneteikna av studieprogram med tett kopling til aktive forskingsgrupper

E. Studieporteføljen skal auke tal studieprogram og emne som kan bli tilbydd til fleire enn heiltidsstudenten

Det er også utarbeida ein eige modell for styring av studieporteføljen (SEFØ-modellen). 

Utvikling av studieportefølje

Resultat frå det systematiske arbeidet med kvalitet i institusjonen er ein del av kunnskapsgrunnlaget ved årleg vurdering og strategisk utvikling av den samla studieporteføljen. Fakultetsleiinga drøftar behov for tiltak på enkeltvise studieprogram, på institutt- eller fakultetsnivå og forslag til endringar i studieporteføljen for neste år med prorektor for utdanning.

Kvart år i juni får styret ei løypemelding om planlagte endringar i studieporteføljen for studieåret eit år fram i tid. Orienteringa bygger på dei innspel som vart lagt fram for prorektor for utdanning i dialogmøta med fakultetsleiinga.

Studieporteføljen ved HVL blir vurdert årleg, når styret handsamer sak om studietilbod og opptaksrammer for kommande studieår. Styret vedtar kva for studium som skal vidareførast, om nye studietilbod skal etablerast, eller om studietilbod skal fasast ut. Høgskulestyet vedtar studieportefølje og rammer for opptak seinast i november kvart år.

Fakulteta sine vurderingar av studieporteføljen er eit viktig grunnlag for saka om studietilbodet. Leiinga ved fakultetet har gjennom studieåret tilgang på ei rekke informasjon frå det systematiske arbeidet med kvalitet i emne og studieprogram, frå Felles studentsystem (FS) og Samordna opptak (SO) og høgskulens planar, som gir grunnlag for å ta avgjerder om utvikling av studieporteføljen og det enkelte studieprogram.

Fakulteta innarbeider tiltak for å utvikle enkeltvise studieprogram i planar på institutt- eller fakultetsnivå.

Periodisk evaluering av studieporteføljen

Ein gong kvar styreperiode skal HVL gjennomføre ei periodisk evaluering av den samla studieporteføljen. Evalueringa skal gje ei overordna vurdering av i kva grad studieprogramma bidrar til å løyse samfunnsutfordringane og oppfylle HVL sine strategiske målsettingar.

HVL gjennomførte den første periodiske evalueringa av samla studieportefølje våren 2021. Evalueringa vart lagt fram for høgskulestyret i sak 32/21.

Evalueringa hadde eit særleg fokus på å skaffe kunnskapsgrunnlag om tilhøve knytt til gjennomgåande utdanningsløp med vekt på følgjande moment:

• HVL sin konkurranseposisjon regionalt, nasjonalt og internasjonalt
• Korleis HVL svarar på regionalt og nasjonalt utdanningsbehov sett i lys av Livslang læring
• Studieporteføljen si økonomiske berekraft

Lenke til styresak med rapport