Innleiing i Gdansk om Scholars at Risk

Det heile tek fullt laust torsdag 20. april, men alt i dag onsdag 19. april har eg saman med prorektor for utvikling Geir K. Resaland i HVL teke del på seminaret «Researchers at risk in Europe» i regi av EUA og organisasjonen Inspireeurope+. Temaet var korleis europeiske universitet og høgskular tek imot forfølgde forskarar i 2023, og korleis dette arbeidet kan utviklast vidare i ei krevjande tid for Europa.



Eg var invitert til å innleia om kvifor og korleis Høgskulen på Vestlandet arbeider med å leggja til rette for og ta imot forskarar som er forfølgde i heimlandet.

I 2017, det første arbeidsåret til HVL, tok me medlemskap i det internasjonale nettverket Scholars at Risk og den norske greina av nettverket. Dette har gitt grunnlag for å arbeida systematisk med dette over tid. Sidan 2020 har HVL kvart år vore vertskap for ein forfølgd forskar, og me arbeider aktivt for godt framhald.

På seminaret ved Gdansk University of Technology onsdag 19. april fekk me diskutera utvikling og satsingar med engasjerte og kunnskapsrike utsendingar frå universitet i Ukraina, Tyrkia, Frankrike, Georgia, Hellas, Island, Polen, Portugal, Spania og Romania. Dei ulike universiteta har ulike vilkår og går inn i ulike nasjonale samanhengar, men er bundne saman av eit internasjonalt fellesskap som fremjar akademisk fridom og motarbeider forfølging.