Eit enkelt val å skulle studere fysioterapi
- Audun Syvertsen (21) frå Moss
- Studererer fysioterapi ved HVL, campus Bergen
– Eg blei fødd med klumpfot, som vil seie at det er ei feilstilling i foten. Det gjorde at eg sleit veldig med å gå tidleg i livet, seier Audun Syvertsen (21).
Heile barndommen blei han send på fysioterapi fem dagar i veka, måndag til fredag.
– Eg vaks på ein måte opp på eit fysioterapiinstitutt og syntest eigentleg det var ganske kjipt å vere der, fortel Audun.
– Eg gjekk glipp av det å vere igjen på fotballbanen etter skulen og det å gjere aktivitetar med vennar.
– Men då eg blei litt eldre, skjønte eg at eg faktisk kunne spele fotball og gjere dei tinga, nettopp fordi eg hadde gått på fysioterapi.
– Då var det verdt det, og eg begynte å tenke at eg ville hjelpe andre på den måten eg har blitt hjelpt sjølv, seier Audun.
No er Audun ein over gjennomsnittet aktiv kar; han speler fotbal, klatrar, og han er med i HVL-studentlaget for padeltennis. I tillegg er han nestleiar i FysioBergen, organisasjonen for fysioterapistudentar ved HVL.
På studiet har han det som plomma i egget.
– Det er veldig lærerikt og kult! Eg er ganske interessert i å lære om korleis kroppen fungerer og korleis ein kan oppnå betre livskvalitet ved å trene og halde seg aktiv, seier den engasjerte studenten.
Til våren fullfører Audun bachelorgraden sin. Etter det vil han gå vidare med masterutdanning og spesialisere seg i fysioterapi for barn og unge.
Han anbefaler Høgskulen på Vestlandet og studentbyen Bergen på det sterkaste.
– Eg kom hit som 18-åring. Eg var livredd, men eg blei tatt så godt imot. Det er opne armar overalt, smiler Audun.
– På studiet er det låg terskel for å spørje om ting, og det er godt samhald. Vi er rundt 100 i klassen, så det er stort, men ikkje så stort.
Audun kan trygt tilråde fysioterapi, både som pasient og student.
– Eg trur ikkje eg hadde vore der eg er i dag, viss det ikkje hadde vore for fysioterapi, seier Audun.
– Eg anbefaler studiet på det sterkaste.
– Viss du er interessert i kroppen og aktivitet, og viss du har lyst til å studere eit yrke som er meiningsfylt, der du føler at du gjer noko for andre, trur eg absolutt fysioterapi er rette vegen å gå.
Tekst: Vetle Nordgård Mikkelsen
Bilde: Vetle Nordgård Mikkelsen og Ingvild Constance Festervoll Melien
