Christine Øye er ny prorektor for forsking

Ho brenn for forsking, og målet hennar er gjere Høgskulen på Vestlandet (HVL) til ein endå sterkare og meir attraktivt forskingsinstitusjon, der forsking er like naturleg som utdanning.

- Eg gler meg til å ta fatt på jobben. Vi har mange sterke forskingsmiljø og mykje bra forsking ved høgskulen i dag. Det skal eg byggje vidare på. Samstundes skal eg jobbe for å styrke kvaliteten på forskinga og gjere HVL enda meir attraktiv for forskarar. Tilsette skal ha gode moglegheiter for karrierebygging innan forsking, seier Øye.

Lang fartstid i høgskulen

Christine Øye har vore tilsett ved HVL sidan 1998 og har lang erfaring, både som undervisar og forskar. I 2016 blei ho professor. Ho har vore breitt involvert i høgskulen, blant anna gjennom styreverv i det fyrste høgskulestyret og ho deltok i gruppa som jobba med HVL-strategi fram mot 2030. Forsking har ein heilt sentral plass i strategien.

- I åra som kjem skal vi styrke forskinga vår ytterlegare og levere forsking av høg internasjonal kvalitet som får gjennomslag i samfunns- og arbeidsliv. HVL er ein ung organisasjon og eit slikt arbeid tek tid, men vi er på veg og skal bygge stein for stein, seier Øye.

Forskingsetikk høgt på agendaen

Sjølv har ho forska innanfor fagfelta psykisk helse og eldreomsorg, og på institusjonar i både kommunar og spesialisthelsetenesta. Tvang, makt og brukarmedverknad er stikkord som pregar forskinga hennar. I tillegg har Øye forska på, og er særleg opptatt av forskingsetikk.

- Eg vil ha forskingsetikk høgt på agendaen, i alle delar av organisasjonen. Særleg innanfor master og ph.d- utdanningane er dette viktig. Forsking både beveger og utfordrar eit felt. Vi skal utdanne studentane til å ha eit kritisk analytisk blikk for å bli betre yrkesutøvarar, seier Øye.

Samfunnsrelevant forsking

Samfunnet treng forskingsbasert kunnskap og kompetanse for å forstå og løyse samfunnsutfordringar. Ved HVL skal forsking og utdanning være integrert og tett på profesjons- og arbeidslivet.

Nettopp samspelet med praksisfeltet og nærmiljøet er noko Øye er opptatt av, og ikkje minst korleis forskinga kan føre til endringar til det betre for samfunns- og arbeidsliv.  

- Eg har forska mykje på implementering, og eg veit at det er lettare sagt enn gjort. Her må vi ha tett samarbeid med dei som skal bruke forskinga, slik at dei erfarer den som relevant.

- Så må vi og våge å føre praksisfeltet ut på glattisen. Eg vil sjå modige forskarar som våger å ta ein fight i det offentlege ordskiftet, avsluttar ho.