Assisterande direktør i Helsedirektoratet, Espen Rostrup Nakstad, var i dag gjesteførelesar for dei som snart er ferdig utdanna sjukepleiarstudentar i HVL. Her i samtale med fagseksjonsleiar i sjukepleie på HVL campus Stord, Leif Steinar Alfsvåg.
Svein Ove Eikenes
Avdelingsleiar
Høgskulen på Vestlandet

Nakstad ga sjukepleiarstudentar gode tips

Assisterande direktør i Helsedirektoratet, Espen Rostrup Nakstad, har vore ei tydeleg og synleg stemme i koronapandemien. I dag var han gjesteførelesar for sisteårs sjukepleiarstudentar i HVL.

Eigentleg skulle Nakstad ha eit innlegg under årets Samtidsdagar på campus Stord i januar. Det måtte han takke nei til i ei travel tid.

I dag kom han tilbake på Zoom og møtte 240 studentar 15 tilsette.

Nakstad snakka om:

«Hvordan kan sykepleiere ta vare på seg selv i en arbeidssituasjon med/post corona?».

– Veldig bra at han tar seg tid til å møte studentane våre innimellom hektisk møteaktivitet og mediearbeid, seier fagseksjonsleiar i sjukepleie på HVL campus Stord, Leif Steinar Alfsvåg.

Dyktig faperson

Han synast det er stas å ha Nakstad med i undervisinga.

– Nakstad er jo ei veldig kjent stemme for oss alle. Han er ein dyktig fagperson og har vore tett på heile pandemien. Veldig fint at han tok seg tid til å møte studentar og tilsette for å dele tankar, erfaringar og kunnskap.

– Han er svært flink til å formidle.

Opna opp for fleire

Alfsvåg seier at økta med Nakstad opprinneleg var for studentar på Stord.

– Med ein så profilert fagperson opna vi opp for sisteårsstudentar ved alle våre campus kor me driv sjukepleiarutdanning. Altså Stord, Haugesund, Førde og Bergen.

Nakstad snakka innleiingsvis om temaet sitt. Etterpå deltok han i ein samtale med Alfsvåg. Studentane hadde førebudd spørsmål til Nakstad.

Gode råd

Alfsvåg seier at Nakstad kom med nokre tydeleg råd til studentane som no snart er ferdig utdanna sjukepleiarar:

  • Det er veldig få helsearbeidarar i Noreg som vert smitta av korona i dag.

  • Ein vil stå i kritiske situasjonar i jobb som sjukepleiarar. Det er viktig at ein kan ta vare på seg sjølv. Ein treng ulike meistringsteknikkar.

  • Det handlar til dømes om å læra seg å kopla ut jobben når ein går heim. Det må ofte nyutdanna sjukepleiarar øve seg på.

  • Pass på å få samtale/debriefing før du går heim frå jobb, viss du har hatt ein tøff dag.

  • I krevjande jobbsituasjonar er det naudsynt å få nok søvn, og å ta igjen søvn.

  • Tenk at arbeidet i avdelinga er ei forlenging av utdanninga di. Pass på å få ei god innføring i jobben/oppgåvene, og å bli godt inkludert. Tenk at dette er ein del av nettverket ditt.

– Ver ærleg på kva du kan og kva du treng å læra. Pass på å få nødvendig opplæring, sa Nakstad til studentane.

– Lær av personar som har lengre erfaring enn deg sjølv, og ver også ein som er tilgjengeleg for at andre skal læra. Det er alltid mykje god støtte å få frå gode kollegaer, avslutta Nakstad.