Ny master i kunstfag opnar for fordjuping og kreativt samspel
Er du lærar i skulen eller kulturskulen? Er du kunstnar eller kulturarbeidar? Frå hausten 2022 har du sjansen til å ta master i kunstfag ved Høgskulen på Vestlandet.
Masterprogrammet er organisert som eit samlingsbasert og nettstøtta deltidsstudium og normert studietid er på fire år.
– Dette masterstudiet er relevant for mange menneske med ulike faglege bakgrunnar – alt frå kunstnarar og kulturarbeidarar til lærarar og musikkterapeutar. Vi håper å skape eit heilt unikt læringsmiljø der ein kan lære, diskutere og la seg inspirere av kvarandre – noko dette masterprogrammet gir rom til, seier Oded Ben-Horin, instituttleiar ved Institutt for kunstfag.
Fire ulike kunstformar
Master i kunstfag er ei ny utdanning som bygger på fire eksisterande masterprogram, noko som vert reflektert i dei fire studieretningane du kan velje:
- Anvendt drama og teater
- Barne- og ungdomslitteratur
- Kunst og handverk
- Musikk
– Som student har du moglegheit til å fordjupe deg i di studieretning, samstundes som vi i fellesemna løfter fram felles perspektiv på kreativitet, estetikk og læring, fortel Åsmund Espeland, høgskulelektor ved Institutt for kunstfag.
Han har vore sentral i å utarbeide den nye mastertilbodet.
Under utdanninga skal ein kunne sjå teori i lys av praksis, blant anna skal studentane i eit av fellesemna i mastergraden gjennomføre eit skapande prosjekt som dei utviklar saman på tvers av studieretningsfaga.
Noko meir enn rein lærarutdanning
Masterutdanninga er absolutt relevant for arbeid i skule, samstundes viser samfunnsutviklinga at behovet for menneske med kompetanse om kreativ læring og formidling aukar også elles i samfunnet.
– Om du er kulturarbeidar eller kunstnar vil denne utdanninga kunne styrke kompetansen din og gi deg kunnskapar og ferdigheiter i det å formidle og bruke kreativitet i samhandling med andre, blant anna i opplæring, Workshops og i anna formidlingsaktivitet, seier Espeland.
Ein fullført master i kunstfag vil kvalifisere deg for opptak til ph.d.-programmet Studier av danning og didaktiske praksiser og andre ph.d.-studier.