Opna ny master i sosialvitskap

Dei over 60 registrerte studentane tar til på studieretningane barnevernsarbeid og miljøterapeutisk arbeid. Etter kvart vil også studieretninga samfunnsarbeid bli ein del av masterprogrammet.

Ein velferdsstat for alle

– De har allereie gjort eit klokt val: å investere i kompetanse, sa arbeids- og inkluderingsminister Marte Mjøs Persen til studentane på det nye masterstudiet.

– Vi ser no mange urolege sider ved tidsbiletet vårt, og historia viser at forskjellane aukar i krisetider. Då blir det enda viktigare med ein velferdsstat som klarer å ta vare på alle. Dette er jo nettopp kva sosialvitskap handlar om, heldt ho fram.

Tett på profesjonane

Rektor Gunnar Yttri understreka at opninga av masterprogrammet i sosialvitskap er ein milepåle og ein viktig byggestein i arbeidet mot at HVL skal bli universitet.

– Med det nye masterprogrammet i sosialvitskap støttar vi behova i samfunnet på ein god måte. Dette er også eit av kjenneteikna ved høgskulen: vie skal vere tett på profesjonane, tett på samfunns- og arbeidslivet og ikkje minst; tett på den enkelte student, sa Yttri i helsinga si.

Mange av studentane ved den nye masterutdanninga var samla under opninga ved campus Bergen. Foto: Lisbeth Amland Heilund.

Fakta om Høgskulen på Vestlandet

• Høgskulen på Vestlandet (HVL) er ein av dei største utdanningsinstitusjonane i landet, med om lag 17.500 studentar. Kvart år uteksaminerer vi 4.500 kandidatar som er med på å løyse viktige samfunnsoppgåver. 
• HVL har sterke og innovative fagmiljø innan helse- og sosialvitskap, ingeniør- og maritime utdanningar, lærar-, kultur- og idrettsfag, natur- og samfunnsvitskap, og økonomi og leiing. 
• Den overordna ambisjonen vår er å bli eit universitet med ein tydeleg profesjons- og arbeidslivsretta profil. Les om universitetsambisjonen. 
• Vi har fem campusar på Vestlandet: Førde, Sogndal, Bergen, Stord og Haugesund.