Statsråd Eileen Fugelsnes (t.v,) presenterte dei nye stdieplassane på eit frukostmøte i Bergen onsdag 7. oktober. Her med rektor Gunnar Yttri, dekan Else Else Cathrine L. Rustad ved Fakultet for helse, og sosialvitskap, og dekan Jens Kristian Fosse ved Fakultet for teknologi, miljø- og samfunnsvitskap.
Svein Ove Eikenes
Avdelingsleiar
Høgskulen på Vestlandet

Framlegget til statsbudsjett: 80 nye studieplassar

HVL får i framlegg til statsbudsjettet for 2027 tildelt i alt 80 nye studieplassar til maskinoffiser-, vernepleie-, og bioingeniørutdanning. Samla sett får HVL ei rammeløyving på 2,7 milliardar kroner. Det er ein realvekst på 1,7 prosent samanlikna med fjoråret.

– Tildelinga av nye studieplassar er godt nytt for HVL, for Vestlandet og Noreg. Vi skal bruka dei godt. Styrkinga av tiltak kring alternative opptaksvegar til treårige ingeniørutdanningar er også bra og naudsynt. Samstundes er kuttet vi får for å finansiere prioriteringar og satsingar i sektoren høgt for HVL sin del. Vi vil merke dette, seier rektor Gunnar Yttri.

Han oppsummerer hovudtrekka i framlegget til statsbudsjettet 2027 for HVL slik:

  • HVL får ein auke på kroner 4,5 millionar kroner for 80 nye studieplassar til maskinoffiser-, vernepleie,- og bioingeniørutdanning.

  • HVL har ein auke i avlagte studiepoeng, ein auke i studentar som fullfører på normert tid, og ein auke i avlagte doktorgradar. Samla utgjer det ein auke i budsjettet på 37,8 millionar kroner.

  • HVL får ein auke på kroner 19,7 millionar kroner for styrkinga av tiltak kring alternative opptaksvegar til treårige ingeniørutdanningar.

  • HVL får ein auke på 10 millionar kroner i eingongsløyving for oppstart av maskinoffiserutdanning.

  • Nedtrapping av studieplassar frå Utdanningsløftet (studieplassar frå koronatida) utgjer eit nedtrekk på 4,1 millionar kroner.

  • Omprioriteringar til satsingar i universitets- og høgskulesektoren utgjer eit nedtrekk på 25,2 millionar kroner.

  • Prisjusteringa i statsbudsjettet utgjer 3,7 prosent.

Viktig styrking av det komande Universitetet på Vestlandet

Rektor gler seg over tildelinga av nye studieplassar. 30 studieplassar til maskinoffiserutdanning vart kjend under opning av nybygget ved campus Haugesund 22. september. 30 nye studieplassar til vernepleieutdanning og 20 nye studieplassar til bioingeniørutdanning vart kunngjort av statsråd Eileen Fugelsnes under eit frukostmøte ved campus Bergen onsdag 7. oktober.

– Nye studieplassar er viktig og ei styrking av det komande Universitetet på Vestlandet. Gjennom fleire år har vi utvikla sterke fagmiljø og gode utdanningar. Samstundes er vi aktive i å møta kompetansebehova i samfunnet og utdanna gode kandidatar.  

Både tilsette og studentar var på plass under frukostmøtet då statsråden presenterte dei nye studieplassane. (Foto: Mauricio E. P. Ramirez og Tora Andersen)

Midlar til alternative vegar inn i ingeniørutdanningane

Regjeringa har over tid varsla at det vil koma eit kompetansebudsjett som ein del av statsbudsjettet. I dag blei det rulla ut. Dei nye studieplassane som HVL har fått tildelt er ein del av denne ordninga. Det heiter seg frå regjeringa at ein vil prioritere helse, realfag og teknologi, både innan utdanning, forsking og innovasjon.

Regjeringa vil også bruke 120 millionar kroner på dei treårige ingeniørutdanningane. Midlane skal mellom anna gå til alternative vegar inn i utdanningane og til å styrke kvaliteten og relevansen i utdanningane. HVL får 19,7 millionar kroner til dette føremålet.

– HVL har sterke fagmiljø og ingeniørutdanningar tilpassa behova i samfunnet. Vi har signalisert at det trengst fleire vegar inn i desse utdanningane, men at det følgjer ein kostnad med. Desse midlane vert viktige og vi vil gjere vårt. HVL er ein stor utdanningsaktør for teknologi og IKT, særleg på Vestlandet, men vi er ein nasjonal aktør.

Høgt nedtrekk for HVL

At innhaldet i kompetansebudsjettet er finansiert gjennom omprioriteringar innanfor den samla rammeløyvinga til universiteta og høgskulane, er noko Yttri merkar seg.

– Det er ei ordning som styresmaktene har lagt seg på over fleire år. Årets nedtrekk er blant det høgaste HVL har hatt. Det legg eit press på rammene våre samla sett.

Fylkesvaraordførar Stian Davies i Vestland fylkeskommune roste HVL for å arbeida godt og i nært samspel med samfunns- og arbeidslivet langs heile Vestlandet. (Foto: Mauricio E. P. Ramirez og Tora Andersen)

10 millionar til nasjonal lærarrekruttering

Rektor merkar seg at regjeringa held fast med å finansiere «Nasjonalt prosjekt for lærarrekruttering» med 10 millionar kroner for 2027.

– Dette prosjektet vert leia av HVL og det ligg eit stort ansvar på oss. Å halde god aktivitet og høg merksemd kring rekruttering til grunnskulelærar-, og barnehagelærarutdanningane er svært viktig.

Yttri fortel at høgskulestyret vil bli orientert om framlegget til statsbudsjettet 2027 under styremøtet ved HVL, campus Haugesund, 22. oktober.

– Det er mykje å gle seg over i framlegget til statsbudsjettet for 2027. Vi styrkar oss på nokre område, samstundes som vi ser at vi må bruka ressursane våre best mogleg i åra som kjem.