Styret styrkar rammene for det kommande universitetet

Styret var i dag samla til årets tredje styremøte. Denne gang ved campus Bergen. Mange saker stod på sakskartet.

I første sak fekk styret ei grundig orientering om framdrifta i universitetsprosjektet og ei oppdatering av institusjonsbesøket frå NOKUT sin sakkyndige komité.

- Styret er nøgd med utviklinga i universitetsprosjektet og ser fram til rapporten frå komitéen til hausten, seier styreleiar Arvid Hallén og legg til:

- Vi står godt inn i kvalitetskriteria som søknaden vår vert vurdert mot. Vi har hatt ei solid utvikling på mange område og inntrykket er at vi er i godt driv framover. 

Han seier at styret ser at det over tid er lagt ned eit stort og omfattande arbeid i alle deler av verksemda.

- Heilt i frå fusjonstidspunktet og til der vi er i dag har det vore arbeidd systematisk og målretta i tråd med strategien og fusjonsplattforma. Vi har lukkast på mange felt og er nær ved å nå målsettinga vår om å realisere eit nytt profesjons- og arbeidslivsretta universitet på Vestlandet. 

Forskingssatsingar kastar av seg

Hallén fortel at fleire av sakene i dagens styremøte underbygger dette ytterlegare.

- Det handlar om å legge gode rammer rundt det nye universitetet. Eit døme er arbeidet med å auke innsatsen inn i den europeiske universitetsalliansen Artemis. 

- Eit anna døme er resultata vi ser gjennom satsinga på rekrutteringsstillingar og korleis det kastar av seg i institusjonen vår óg for arbeidslivet kring oss. I styremøtet i juni vil vi få ei ny oppdatering om utviklinga rundt forskingssatsingane. Her er det mykje positivt.

Realisere nytt bygg

Konturane av det nye universitetet på Vestlandet viste også igjen i sakene om satsingsforslag utover ramma i statsbudsjettet, dei gode tilbakemeldingane frå NOKUT-tilsynet med HVL sitt kvalitetssystem og kvalitetsarbeid, oppretting av æresdoktorat – og ikkje minst i saka om utvikling av nordtomta på Kronstad.

- Dette er ei spennande sak. Styret ser stor verdi i å realisere eit nytt bygg på Kronstad saman med Vestland fylkeskommune og Fagskulen Vestland. 

- Her ligg det til rette for eit godt samarbeid som møter samfunnets behov på ein god måte. Skulle vi få med VilVite i prosjektet vil det og vere svært positivt.

Biletet viser den såkalla "Nordtomta" på Kronstad.

Hallén seier at HVL treng meir areal ved campus Bergen for å møte vekst i tal på studentar og tilsette.

- Vi har også trong for meir areal til laboratorium og fleksible undersvingsareal. Sambruk og samordning med Fagskulen Vestland vil vera bra. Det å realisere eit nytt bygg vil utan tvil styrke heile det nye Universitetet på Vestlandet og studiebyen Bergen.

Styreleiaren understrekar at styret er opptatt av å halde god framdrift i prosjektet.

- Saka treng god framdrift, samstundes som vi må få klargjort dei ulike risiko som ligg her. 

Vil ta seg tid

I orienteringssaka om prosjekt medverknad og styring ga styret signal langs to spor. 

- Det første er å arbeide videre med å styrke og forbetre dei grunnleggjande strukturane knytt til medverknad og medråderett i alle deler av høgskulen, i tråd med anbefalingane som kunnskapsgrunnlaget trekk opp. 

- Det andre er å ta seg tid til å greie ut om ein skal halde fram med å styrke dagens ordning med fakultetsråd, eller innføre ei ordning med fakultetsstyre. Styret ønskjer å belyse dette breitt ved å sjå på føremoner og ulemper langs fleire dimensjonar. Eit styreseminar kan vera ein god arena for å drøfte dette. Gjennom det kan vi få på plass eit grunnlag for ei avgjerd i løpet av hausten.

Av andre saker styret handsama under møtet ved campus Bergen var:

• Søkartal

• Orientering om innhaldet i administrative fellestenester og institusjonsmidlar

• Årsrapport frå studentombodet

• Årsrapport frå internrevisjonen

• Orientering om beredskap og informasjonstryggleik