Læringsmiljøprisen ved HVL
Læringsmiljøprisen ved HVL har som formål å synleggjere godt arbeid for læringsmiljøet ved høgskulen. Mottakar av prisen må ha gjort ein særleg innsats for studentar sin læring og trivsel og for å fremje eit inkluderande læringsmiljø.
Statuttar for tildeling av prisen
- HVL sin pris for læringsmiljø er ein pris som vert delt ut anna kvart år og er oppretta for å gi anerkjenning til et fagmiljø, en administrativ eining, studentdrivne tiltak eller enkeltpersonar som har gjort ein markert innsats i arbeidet for å utvikle læringsmiljøet.
- Ved tildeling av prisen skal det leggast vekt på systematisk innsats for å legge til rette for eit godt læringsmiljø, gjort målretta innsats mot studentanes læring gjennom fagleg, pedagogisk og sosial innsats eller gjennom god tilrettelegging av læringsmiljøet. Tiltaka vil dreie seg om det fysiske, det psykososiale, det pedagogiske, det organisatoriske og det digitale læringsmiljøet, i tillegg til universell utforming. Prisen skal gå til tiltak som har eit breitt nedslagsfelt og som er overførbart til andre læringsmiljø.
- Alle tilsette, studentar og formelle studentorgan kan kome med framlegg til kandidatar. Forslaga må vere grunngjevne for å bli vurdert. For å få fram breidda i prosjektet eller arbeidet til enkeltpersonar ein ønskjer å nominere, er det ein fordel at til dømes fleire studentar går saman og nominerer.
- Læringsmiljøutvalet oppnemner ein jury som får fullmakt til å vurdere søknadane og gjere vedtak om kven som skal få prisen. Juryen skal bestå av to studentar, ein administrativ tilsett og ein vitskapleg tilsett frå Læringsmiljøutvalet. Juryen skal også ha eitt eksternt medlem. Prorektor for utdanning ved HVL leder juryen og Avdeling for utdanningskvalitet har sekretariatsfunksjonen. Dersom det vert vurdert at det ikkje er kvalifiserte kandidatar vert ikkje prisen delt ut.
- Prisen består av ein pengesum, for tida kr 75.000, og eit diplom. Prispengane skal brukast til tiltak som fremjar læringsmiljø på campus og/eller i studieprogramma. Prisvinnaren skal informere Læringsmiljøutvalet om kva midlane er brukt eller planlagt brukt til innan eit år etter tildeling.
- Prisen blir utdelt i eit digitalt felles prisutdelingsarrangement ved HVL anna kvart år.
- Prisen blir lyst ut tidleg haust og fristen for å kome med forslag på kandidatar blir sett til seinast halvannan månad før utdelinga. Utlysinga av prisen skal kunngjerast med ein felles tekst på nettsidene til HVL, på infoskjermar, i Canvas til studentar og via sosiale media.
