Til lukka med 8. mars!
Kvinnesak er menneskesak. Kvinnerettar er menneskerettar. Kvinner. Liv. Fridom.
Barnehagelærarstudent ved Høgskulen på Vestlandet og kunstnar Sayeh Kazemi er av iransk opphav, I dag heldt ho ei gripande førestilling, ein performance, på Kronstad, vårt campus Bergen.
Smak på tittelen: «Freedom of speech is meaningful when bodies are free in society”.
Publikum fekk ta del i frigjeringa av dansaren, mennesket, som var bunde og tjora i raude reip.
«Release me from the ropes to free my body». Smertefull frigjering fann stad.
Publikum talde studentar, tilsette og heile styret for Høgskulen på Vestlandet.
Tusen takk, Sayeh!
I over fem månader har heile verda gjennom media, vore vitne til protestane frå folket i Iran og kampen for fridom og frigjering. Folket i Iran har gått ut i gatene for å vise si avsky til undertrykking og presteskapet sitt regime etter at den 22 år gamle jenta ved namn Masha Amini, blei drepen av det såkalla moralpolitiet. Kvinner har stått og står framleis i frontlinja.
Brutaliteten i Iran er retta mot iranske kvinner og menn som arbeider for grunnleggjande menneskerettar og retten til å leva fullverdige liv. Verdiar og rettar som er viktige å halde høgt og kjempa for. Kvinner. Liv. Fridom.