Godt nytt år!

Takk for alt samvær og samarbeid i året som gjekk! Eg ser fram til å gå inn i 2023 saman med dykk alle.
Eg gler meg til å ta fatt på eit nytt arbeidsår som rektor for Høgskulen på Vestlandet HVL. Nær 17 000 studentar og 2 000 tilsette, høg samfunnsrelevans og internasjonal kvalitet i utdanning og forsking, og fem moderne campus på Vestlandet, gir eit formidabelt arbeidsgrunnlag.
 
Kunnskapsdepartementet har for 2023 tildelt Høgskulen på Vestlandet 2 284 700 000 kroner. Dei midlane vil me, saman med andre eksterne inntekter, ta i bruk på aller beste vis.
 
Politiske signal, økonomiske utsikter og endringar i samfunnet, nasjonalt og internasjonalt, ber bod om at 2023 vert eit år der me må gjera gode og modige val, val som vil styrka oss i utøvinga av samfunnsmandatet vårt i åra som kjem.
 
Kvart år dannar og utdannar me nær 4 500 kandidatar til arbeidslivet. Vår profesjons- og arbeidslivsretta profil sikrar høg samfunnsrelevans innafor økonomi, næring og teknologi, innanfor helse, velferd og omsorg, innanfor oppvekst, idrett og opplæring, og innanfor natur, kultur og samfunn.
Med campus i Bergen, i Førde, på Stord, i Haugesund og i Sogndal er me særleg viktige for kunnskapsbygging og kompetanseutvikling på Vestlandet. Men den kvaliteten me klarar å utvikla i utdanning og forsking spelar ei nasjonal og internasjonal rolle.
 
I kraft av våre fag, tilsette og studentar, har me innverknad på løysinga av vår tids store problemstillingar:
  • Berekraft i økonomi, samfunn, natur
  • Demografisk utvikling
  • Tilliten til vitskap
I vårt arbeid med å tilby unge menneske den beste utdanninga, er me alltid opptekne av at undervisninga er forskingsbasert og byggjer på dei beste metodar. I tider med ufred og ustabilitet i samfunnet, er det i tillegg særleg viktig å byggja mot hjå dei unge: Mot til å satsa på utdanning i samspel med andre studentar, mot til å byggja kunnskap og dugleikar over tid, og mot til å bruka seg sjølv og eigne kunnskapar og dugleikar i byggande verksemd i arbeids- og samfunnsliv.
 
Nyleg har me fått på plass ny utviklingsavtale med Kunnskapsdepartementet for 2023 – 2026. Avtalens tre tydelege og ambisiøse mål gjer Høgskulen på Vestlandet (HVL) godt:
  • Forskinga ved HVL held høg internasjonal kvalitet og er med på å forma samfunns- og arbeidslivet.
  • Dei profesjons- og arbeidslivsretta utdanningane ved HVL skal dekka framtidas kompetansebehov.
  • HVL er ein samskapande høgskule med levande campusar som tek ei tydeleg regional rolle.
Utviklingsavtalen passar godt saman med vår flunkande nye strategi gjeldande frå 2023 til 2030. Strategidokumentet vitnar om eit sterkt og ansvarleg samband mellom høgskule, folk og samfunn. Sambandet gir retning til det moderne nye universitetet. Visjonen er enkel, men talande: Kunnskap som byggjer menneske og samfunn.
 
Godt nytt år!