One Ocean Expedition
Laurdag 15. april vart Statsraad Lehmkuhl helsa velkommen heim til Bergen og Noreg etter 20 månaders jordomsegling.
I Vågen venta ei ærerik innsegling med kong Harald og tusenvis av menneske budde til fest.
Jordomseglinga, One Ocean Expedition, har fremja FNs berekraftsmål og havet si avgjerande rolle. Det heile vert fullenda med ei særmerkt flott veke: One Ocean Week i Havbyen Bergen. Bergen kommune og Vestland fylkeskommune står i brodden for fleire gode samarbeidspartnarar, Høgskulen på Vestlandet mellom desse.
På sjølve ekspedisjonen har me
- delteke på fleire seglingsetappar med studentar og tilsette,
- hatt ingeniørstudentar som har vore med på forskingsarbeid kring vatn,
- styrka samarbeidet mellom skular i Bergen og i Sør-Afrika,
- hatt kunstprosjekt med havet som tema i barnehagar,
og saman med Bergen næringsråd har me skipa kurs i berekraftig leiing.
No gler me oss til å ta del i og bidra til fleire spennande arrangement i One Ocean Week i Bergen.