Innspelsmøte om ny profesjonsmelding
«Samspel mellom by, bygd, universitet og høgskule for framifrå velferdstenester». Dette var tittelen då statsråd for forsking og høgare utdanning Ola Borten Moe opna og leia det første innspelsmøtet til ny profesjonsmelding på Oppdal.
Tilskipinga fann stad på Krux innovasjonssenter. Fleire høgare utdanningsinstitusjonar, Norsk studentorganisasjon, kommunar, fylkeskommune, helseføretak og sjukehus tok del, og sytte for ein frisk start.
Regjeringa har vedteke å leggja fram ei profesjonsmelding våren 2024. Hovudvekta vil vera på lærar-, ingeniør-, helse- og sosialfagutdanningane. Bakgrunnen for meldinga er å få kunnskap om tiltak som sikrar samfunnet god tilgang på kompetent arbeidskraft, at profesjonsutdanningane gir rett kompetanse og at me har inkluderande utdanningar.
Utetter våren skal fleire tematiske innspelsmøte finna stad på ulike stader i landet. Lærarutdanning, ingeniørutdanning, livslang læring og inkluderande profesjonsutdanningar vert sett under lupa.
27. mars er Høgskulen på Vestlandet på vegne av Kunnskapsdepartementet vertskap for innspelsmøtet om helse- og sosialfagutdanningar. Det skjer på vårt campus i Bergen. Me gler oss!