MSAM413 Kampen om fortida - bruken av historie i samfunn og politikk

Innhald og oppbygging

Emne 4 er eit valemne i mastergradsstudiet i samfunnsfagdidaktikk, og går andre semester i studiet.

Historie har vore og vert framleis brukt til å byggja nasjonar, skapa identitet eller oppnå politiske mål. Media, utdanningsinstitusjonar, politiske parti og ei rekkje andre aktørar påverkar, medvite eller umedvite, vår oppfatning av fortida. Tilhøvet mellom politikk, historievitskap og historiedidaktikk i vid tyding av omgrepet vil vera eit sentralt tema i emnet. Sentralt i emnet står ei kritisk drøfting av bruken av historie, både i og utanfor undervisnings- og museumsinstitusjonane, i ein vidare samfunnsmessig samanheng.

Sentrale undervisningsemne:

• Drøfting av sentrale didaktiske omgrep som historiemedvit, historiekultur, historiebruk og erindringpolitikk
• Historiebruk i praksis - døme på historiske kamparenaer nasjonalt og internasjonalt

Læringsutbytte

Ein kandidat som har fullført emne 4 skal ha følgjande læringsutbyte definert i kunnskap, ferdigheiter og generell kompetanse:

Kandidaten

• har god kjennskap til sentrale omgrep som historiemedvit, historiekultur og erindringspolitikk
• har gode kunnskapar om konkrete situasjonar / konfliktar der historiekultur og erindringspolitikk står eller har stått sentralt
• kan reflektere kritisk kring historiesyn og perspektiv i politiske tekstar, lærebøker og akademisk historieskriving

Kandidaten

• har ei kritisk og sjølvstendig haldning til historiske framstillingar
• kan presentere og diskutere fagstoffet munnleg og skriftleg

Generell kompetanse

• kan reflektere kring måtar historie brukast på i politikk, undervisning, og den ålmenne samfunnsdebatten
• kan nytte kunnskapen om historiebruk til å utvikle nye problemstillingar og perspektiv

Undervisnings- og læringsformer

Undervisninga skjer som ein kombinasjon av førelesingar, sjølvstudium og diskusjon av tekstar og studentarbeid i seminar. Det vert sett krav til aktiv deltaking frå studentane i form av innlegg på seminaret. Studentane skriv eit essay over eit sjølvvalt tema. Temaet skal handle om problematikkar, situasjonar, hendingar, minnestader eller konfliktar der historiekultur og historiebruk står sentralt. Essayet skal presenterast munnleg og skriftleg i seminar som utgangspunkt for diskusjon og refleksjon kring temaet. Arbeidsformene legg stor vekt på problematisering, kritisk refleksjon og diskusjon.

Emnet inkluderer også ein studietur til Irland. Turen er ikkje obligatorisk. Turen er i utgangspunktet knytt til valemnet MSAM413, men er óg open for dei studentane som tar det andre valemnet (MSAM313). Turen går over 6 -7 dagar og kostar ca. kr. 6000 kr (det inkluderer flybillettar, overnatting, buss, inngangsbillettar etc.).

Obligatorisk læringsaktivitet

Det vert sett krav til aktiv deltaking frå studentane i form av eitt seminarinnlegg og eit essay på omlag 4 sider (ca. 1600 ord). Utfyllande retningsliner for arbeidskrava vert gjevne ved semesterstart.

Godkjend arbeidskrav er gyldig i tre semester etter godkjenning.

Vurderingsform

Munnleg eksamen på inntil 45 min. Til grunn for den munnlege prøva ligg pensum og det skriftlege essayet.

Tid og stad for eksamen vert annonsert på emnets sider på Itslearning.

Karakterskala A-F, der F er ikkje bestått.