LUPEM501 Profesjonsfag med fagleg fordjuping

Innhald og oppbygging

Profesjonsfaget er eit verdi- og danningsfag som skal gje studenten identitet og handlingsberedskap som musikklærar, og danne den lærarfaglege plattforma i utdanninga.

Faget skal ivareta samanhengen mellom musikk, pedagogikk, musikkpedagogikk og musikkdidaktikk. Studentane skal utvikle eit analytisk og kritisk perspektiv på arbeid med musikkopplæring, og eigen praksis som framtidig musikklærar. Dette skal forankrast i musikkpedagogisk forsking og anna relevant forsking, samt i vitskapsteoretiske og etiske grunnlagsproblem. Profesjonsfaget skal gje innsikt i musikkpedagogisk grunnlagstenking, tradisjonar og utviklingstrekk. Faget skal bidra til kunnskap om mangfald i elevar si bakgrunn og musikkulturelle føresetnader, og bidra til at studentane kan reflektere over musikkpedagogiske praksisar sitt bidrag til aktuelle samfunnsutfordringar.

Emnet går parallelt med masteroppgåva i 5. studieår.

Sentrale tema i emnet er:

• Danning, oppseding og utdanning i eit kritisk perspektiv
• Musikkpedagogiske grunnlagsproblem, tradisjonar og utviklingstrekk
• Profesjonsetiske perspektiv på musikklærarpraksis
• Musikkpedagogisk praksis og aktuelle samfunnsutfordringar

Læringsutbytte

Ved fullført emne skal studenten ha følgjande totale læringsutbytte:

Kunnskapar

Studenten

• har inngåande kunnskap om mangfald i elevar si bakgrunn og musikkulturelle føresetnader
• har avansert kunnskap om korleis elevar si musikalske danning, læring, sosialisering og identitetsutvikling skjer på ulike musikkulturelle og pedagogiske arenaer
• har avansert kunnskap om ulike musikkpedagogiske og musikkdidaktiske grunnsyn, og deira historiske og teoretiske forankring
• har inngåande profesjonsfagleg kunnskap i musikk, inkludert musikkpedagogiske tradisjonar, grunnlagsproblem og forskingsbaserte perspektiv

Ferdigheiter

Studenten

• kan kritisk vurdere musikkopplæringa si rolle, funksjon og legitimitet i samfunnet
• kan kritisk analysere og bruke opplæringa sitt verdigrunnlag i musikkfaglege og musikkpedagogiske kontekstar
• kan kritisk drøfte utfordringar og moglegheiter i realisering av læreplanar og andre styringsdokument
• kan identifisere og kritisk drøfte profesjonsetiske spørsmål i musikklærarpraksis med grunnlag i aktuell musikkpedagogisk teori og forsking
• kan med utgangspunkt i forskingsbasert og profesjonsretta musikkpedagogisk kunnskap grunngje eigne didaktiske, pedagogiske og etiske val i musikkopplæring

Generell kompetanse

Studenten

• kan drøfte musikkdidaktiske konsekvensar, utfordringar og moglegheiter i ein utviklingsorientert skule eller organisasjon
• kan kritisk og sjølvstendig reflektere over musikkpedagogiske praksisar sitt bidrag til aktuelle samfunnsutfordringar
• kan bruke relevant forsking som grunnlag for utvikling og endring av musikkfagleg og musikkpedagogisk praksis og som grunnlag for ei masteroppgåve
• kan på avansert nivå identifisere, vurdere og formidle musikkpedagogiske problemstillingar

Krav til forkunnskapar

Ingen

Tilrådde forkunnskapar

LUPEF103 Lærarrolla og elevane si læring og utvikling

LUPEF403 Den profesjonelle læraren

Undervisnings- og læringsformer

Det vil bli brukt varierte undervisnings- og arbeidsmåtar, med vekt på studentaktivitet. Det blir lagt opp til litteraturseminar og verkstader knytt til sentrale tema i emnet med bruk av norsk og internasjonal forskingslitteratur.

Det er føresett at studentane deltek aktivt i undervisninga, og at dei arbeider med lærestoffet på eiga hand. Refleksjon og kritisk drøfting av forsking, teori og praksis knytt til masterfaget er sentralt i emnet.

Obligatorisk læringsaktivitet

Følgjande obligatoriske læringsaktivitetar må vere godkjende for at studenten kan framstille seg til eksamen:

• Aktiv deltaking og godkjent frammøte (minimum 80 %) i undervisning
• Munnleg gruppeoppgåve med godkjent frammøte
• Litteraturseminar med godkjent frammøte
• Individuell skriftleg oppgåve knytt til formulering av eige musikkpedagogisk grunnsyn

Obligatoriske læringsaktivitetar må vere godkjende seinast 2 veker før studenten kan møte til eksamen. Dersom ei obligatorisk læringsaktivitet blir vurdert som ikkje godkjent, skal studenten få grunngjeving for dette. Studentar som ikkje får godkjent ei obligatorisk læringsaktivitet vil, så langt det let seg gjere innan fastsette fristar, få eitt nytt forsøk i inneverande semester.

Nærare retningsliner for obligatoriske arbeidskrav blir gitt ved semesterstart.

Vurderingsform

Individuell munnleg eksamen (30 minutt) over oppgitt emne frå pensum. Eksamensoppgåver blir levert ut til alle studentar ca. 4 veker før eksamen, trekking skjer 2 veker før eksamen. Eksamensspråk er norsk eller engelsk (valfritt). Inntil 10 minutt samtale med sensorane etter presentasjonen.

Karakterskala A-F, der F tilsvarar ikkje bestått.

Hjelpemiddel ved eksamen

Alle hjelpemiddel er tillate ved førebuing til eksamen. Studentar må følgje HVL sine retningsliner for bruk av KI.

Meir om hjelpemiddel