Kvifor studere Maritime Human Factors?
Kurset gir ei innføring i samarbeid og arbeidsmiljø i maritime organisasjonar. Du får utforske og reflektere over sentrale tema som psykologisk tryggleik, mobbing og trakassering, tillit, mangfald og kor viktig det er å skape arbeidsmiljø som støttar menneska som arbeider om bord og i den maritime næringa.
Læringsmateriellet er nettbasert og fleksibelt, slik at du kan utforske, reflektere og lære i ditt eige tempo, heilt gratis.
Læringsutbytte
Etter kurset skal du kunne:
- reflektere over den viktige rolla menneske har i den maritime næringa
- forstå menneskeleg åtferd, samarbeid og strategiar for å betre arbeidsmiljøet
- forstå korleis menneske bidreg til tryggleik, og korleis dei kan få støtte i dette arbeidet
Kursbevis
Kursbevis
Dersom du ønskjer kursbevis etter at du har fullført kurset, kan du sende ein e-post til ftms-studie@hvl.no med namnet på kurset i emnefeltet. Kurset gir ikkje studiepoeng.
- Kurset er kun ope for deltakarar med norsk BankID
- Søknadsfristen er 1. desember 2026
Undervisningsform
Kurset er lagt opp med tanke på fleksibilitet og inneheld videoar, skriftleg materiale og interaktive aktivitetar. Du kan lære i ditt eige tempo, uansett kvar du er. Det er ingen formelle opptakskrav.
Du har tilgang til kurset i læringsplattforma Canvas fram til og med 15.12.2026.
Kursstruktur - fire modular
Kurset består av fire modular:
- Psykososialt arbeidsmiljø
Denne modulen handlar om det psykososiale arbeidsmiljøet. Vi introduserer og forklarer sentrale teoretiske omgrep før vi ser nærmare på konkrete utfordringar i dagens maritime arbeidsmiljø. Til slutt utforskar vi strategiar for å betre og utvikle det psykososiale arbeidsmiljøet i maritime organisasjonar.
-
Kultur, mangfald og tryggleik
Menneskeleg kommunikasjon er kompleks, og denne modulen tek for seg fleire sider ved denne kompleksiteten. Vi ser mellom anna på korleis kommunikasjon handlar om både å lytte og å uttrykkje seg, og på ulike balansegangar i kommunikasjonen.
Modulen tek også opp paradoks, til dømes korleis vi i nokre samanhengar kan ha behov for å bruke stereotypiar for å overvinne fordommar som kan stå i vegen for effektivt og trygt samarbeid. Vidare utforskar vi omgrepet kultur og korleis menneske kan bruke kulturelle ressursar til å byggje bru over forskjellar og samarbeide effektivt og trygt.
-
Tillit og tryggleik
Tillit er ein grunnleggjande og kompleks del av alle menneskelege relasjonar – både mellom menneske og mellom menneske og gjenstandar eller teknologi. I alle former for samhandling vurderer vi kontinuerleg om vi kan stole på den andre personen eller det vi samhandlar med.
Når tilliten er høg, blir relasjonane ofte sterkare, samarbeidet meir effektivt og tryggleiken betre. Samstundes må vi uunngåeleg samhandle med menneske vi ikkje har full tillit til. Korleis påverkar det åtferda vår? Korleis bør vi handtere relasjonar med låg tillit? Og korleis heng tryggleik saman med dei mange nyansane i tillit?
For å svare på desse spørsmåla må vi forstå kva tillit er, korleis vi vurderer om nokon eller noko er til å stole på, og – ikkje minst – korleis tillit blir bygd opp, halden ved like eller går tapt.
-
Er alt om bord utforma for menneske?
Denne modulen introduserer omgrepet menneskesentrert design og ser på kor viktig det er å ta omsyn til menneskelege behov når vi utviklar ny teknologi og andre delar av arbeidsmiljøet.
Målgruppe
Kurset er for alle med norsk BankID og passar for deg som arbeider i den maritime næringa, og som er interessert i menneskeleg åtferd og teknologi.
Kurset vert undervist i på engelsk.
Møt undervisarane
