Integrert fag- og språklæring i barnehagelærarutdanninga (BLU-norsk)

Prosjektsamandrag

I prosjektet BLU-norsk har vi som mål å kartlegge og utvikle undervisningspraksisar der studentar som har behov for ekstra språkstøtte som ein del av utdanninga får tilbod om dette. Studentar som søker opptak til høgare utdanning må dokumentere språkferdigheiter på B2-nivå, eller liknande. Likevel vil ikkje generelle språkkrav førebu ein spesifikt på fagspråket ein møter i utdanninga. Prosjektet er bygd på ei forståing om at det ikkje er språkkrava som skal aukast, men at utdanningane har behov for systematiske tiltak for å legge til rette for integrert fag- og språklæring som ein del av utdanninga. Å ha norsk som undervisningsspråk inneber at ein i det munnlege språket møter store variasjonar i måtar å snakke norsk på, engelsk, samt svensk og dansk. I eitt og same fag kan ein møte skriftspråka nynorsk og bokmål, ein møter engelsk og i større og mindre grad svensk og dansk. Samtidig skal studentane aktivt ta i bruk språkkunnskapen sin i akademiske tekstar, i gruppearbeid med medstudentar, samt i både faglege- og kvardagssamtalar i praksis. Det krev samansette språkferdigheiter og i dette prosjektet har vi som mål å undersøke: 1) Korleis opplever studentar med norsk som andrespråk at det blir lagt til rette for språk- og faglæring på studia? 2) Kva for støtte har faglærarar som ikkje har fagbakgrunn i språk? 3) Kva ligg til grunn for praksisrettleiarar sine vurderingar av studentar med norsk som andrespråk i praksis? Basert på denne forskinga skal det utviklast ressursar for studentar som har behov for ekstra språkstøtte som ein del av utdanninga, og ressusar for førelesarar som skal undervise og rettleie i fleirspråklege studentgrupper.