KKKA300 Kunst, kultur og kreativitet

Innhald og oppbygging

Utvikling av praktiske dugleikar, estetisk merksemd og skapande evner utgjer ein sentral del av kunnskapsområdet. Barnehagelæraren har ansvar for at alle barn i ulike aldersgrupper utvikler eit rikt uttrykksrepertoar gjennom allsidige sanseopplevingar, kroppslege erfaringar, tid til leik og eksperimentering, refleksjon og kommunikasjon. Kunnskapsområdet sitt mål er å bruke kunstfaglege arbeidsformer i ei tydeleg profesjonsrolle, som inviterer til utforskande og skapande verksemd og ser samanheng mellom estetiske læringsprosessar og leik, læring og danning hos barn.

Barnehagen utvikler sin kultur i nært samspel med ulike aktørar i kunst- og kulturfeltet i lokalmiljøet, og kunnskapsområdet tydeleggjer barnehagelæraren sitt ansvar for å gje barn tilgang til kulturelle tradisjonar og aktuelle strømningar i kunst- og kulturliv.

Kunnskapsbasen bygger på barnehagepedagogisk kunnskap, kunstfaga musikk, drama, forming og norsk, og på kunstnarleg utviklingsarbeid og forsking med relevans for kunnskapsområdet.

Praksisstudiet er integrert i kunnskapsområdet. I praksisstudiet 3. studieår skal studenten arbeide med leiing av barn og barnehagen.

Læringsutbytte

Ved fullført emne skal studenten ha følgjande læringsutbytte:

Kunnskapar

Studenten

• har innsikt i korleis faga i kunnskapsområdet bygger på barn sin leik, og innsikt i korleis kunst og kultur virkar inn på barn sine uttrykksformar
• har kunnskap om barnekultur, samiske kunst- og kulturtradisjonar, kulturelt mangfald og norsk kulturarv
• har kunnskap om leik, samspel og formidling i kunstfagleg arbeid
• har kunnskap om estetiske virkemiddel, arbeidsmåtar, material, instrument, verktøy og teknologi i litteratur, musikk, drama og forming
• har kunnskap om barn si utvikling innanfor dei estetiske fagområda, og dei estetiske fagområda si tyding for barn si utvikling

Ferdigheiter

Studenten

• viser evne til å bruke dramatiske, visuelle, musikalske og litterære virkemiddel, og kan bruke fagspesifikke reiskapar, teknikkar og materiale i dei ulike fagområda
• kan integrere element frå fagområda drama, norsk, forming og musikk i fleirfagleg arbeid
• kan stimulere barn til å utforske, leike, lære og skape gjennom analoge og digitale uttrykksformer
• kan bruke sin faglegheit til improvisasjon i leik og skapande prosessar
• kan legge til rette for barns møter med eit mangfald av kunst- og kulturuttrykk frå fortid og notid
• kan leie estetiske læringsprosessar med og for barn og medarbeidarar, og ivareta fagleg og etisk refleksjon i dokumentasjon og vurdering
• kan skape inne- og uterom som inviterer barn til estetiske opplevingar, undring, utforsking, skaparglede og leik
• kan samtale med barn om kunst- og kulturuttrykk

Generell kompetanse

Studenten

• kjenner barnehagelærarens tyding som medskapar, deltakar og rollemodell i barn sine estetiske læringsprosessar
• kan stimulere barns musiske veremåte
• kan bygge på utviklingsarbeid og forsking i kunst- og kulturfagleg arbeid i barnehagen
• ser barn som kompetente deltakarar på samfunnet si kulturarena og sikrar barn sine ytringar og demokratiske rettar ved å fremje deira estetiske språkformer

Krav til forkunnskapar

BBLAPR200 Praksis 2. år.

Tilrådde forkunnskapar

Ingen

Undervisnings- og læringsformer

Studiet blir organisert med varierte arbeidsformer som fleirfagleg og tverrfagleg arbeid, forelesingar, gruppearbeid, seminar, praktisk arbeid, verkstadarbeid, utprøving i eigen barnehage og sjølvstudium. Hovudvekta i studiet vil i stor grad vere praktisk-metodisk, men vil også kreve sjølvstendig arbeid med pensumlitteratur. Det blir lagt vekt på kunstfaglege arbeidsformer slik som praktisk framføring, ulike former for dokumentasjon, prosessuelt verkstadarbeid, utstilling, musisering, osv.

Studentane betalar kostnader til formingsmaterialer, 200 kroner, og må sjølv halda noko utstyr og materiale. Studentane dekker og sjølv billett til minst ein konsert, utstilling, film og/eller profesjonell teaterforestilling (ca kr. 400).

Praksis

Praksis vert gjennomført etter eigne læringsutbytter som står oppført i studieplanen. Informasjonen om praksis BBLAPR300 ligg i utdanningsplanen for ditt kull og på nettsida for praksis i barnehagelærerutdanninga.

Obligatorisk læringsaktivitet

Fylgjande obligatoriske læringsaktivitetar må være godkjent før studenten kan framstillast til eksamen.

1. Godkjent obligatorisk deltaking (minimum 80 %) knytta til læringsutbytta:

Studenten:

• viser evne til å bruke dramatiske, visuelle, musikalske og litterære virkemiddel, og kan bruke fagspesifikke reiskapar, teknikkar og materiale i dei ulike fagområda.
• har kunnskap om estetiske virkemiddel, arbeidsmåtar, material, instrument, verktøy og teknologi i litteratur, musikk, drama og forming

Ved manglande deltaking må undervisning i emnet takast på nytt.

2. Eit tverrfagleg (musikk, drama, forming) framlegg i gruppe der ein formidler og reflekterer over estetiske læreprosessar ein har tilrettelagt for i praksis knytta til læringsutbytta:

Studenten:

• kan integrere element frå fagområda drama, norsk, kunst og handverk og musikk i fleirfagleg arbeid
• kan formidle sentralt fagstoff munnleg og skriftleg, og kan delta i fagleg diskusjon og presentasjon knytta til kunstfagleg arbeid i barnehagen på ein kvalifisert måte.

Dersom oppgåva ikkje vert godkjent på første forsøk, vert det gitt eit nytt forsøk.

3. Prosessarbeid i musikk, drama og forming knytta til læringsutbytta:

Studenten:

• har kunnskap om barn si utvikling innanfor dei estetiske fagområda, og de estetiske fagområda si betydning for barn si utvikling
• kjenner barnehagelærarens betydning som medskapar, deltakar og rollemodell i barn sine estetiske læringsprosessar
• kan formidle sentralt fagstoff munnleg og skriftleg, og kan delta i fagleg diskusjon og presentasjon knytta til kunstfagleg arbeid i barnehagen på ein kvalifisert måte.

4. Ei oppgåve knytt til å planlegge, gjennomføre og reflektere over estetisk litteraturformidling i barnehagen (norsk) knytta til læringsutbytta:

Studenten:

• viser evne til å bruke dramatiske, visuelle, musikalske og litterære virkemiddel, og kan bruke fagspesifikke reiskapar, teknikkar og materiale i dei ulike fagområda
• kan formidle sentralt fagstoff munnleg og skriftleg, og kan delta i fagleg diskusjon og presentasjon knytta til kunstfagleg arbeid i barnehagen på ein kvalifisert måte.

Dersom oppgåva ikkje vert godkjent på første forsøk, vert det gitt eit nytt forsøk.

Dei obligatoriske læringsaktivitetane må vere godkjende av emneansvarleg seinast 2 veker før studenten kan framstille seg til eksamen. Dersom ein obligatorisk læringsaktivitet blir vurdert som ikkje godkjend, skal det bli gitt ei grunngjeving for dette. Studentar som ikkje får godkjend ein obligatorisk læringsaktivitet vil, så langt det let seg gjere innan fastsette fristar, få eit nytt forsøk i inneverande semester.

Vurderingsform

Eksamen består av to deleksamenar:

1) praktisk gruppeeksamen.

2) individuell munnleg eksamen

Kvar deleksamen tel 50 % av karakteren i emnet.

Karakterskala A-F, der F svarer til ikkje bestått.

Begge delar må vere bestått for å få karakter i emnet. Bestått deleksamen treng ikkje takast opp att.

Del 1: Praktisk gruppeeksamen. Det blir trekt eksamensgrupper som skal utvikle ei tverrfaglig framvisning over eit gitt antal dagar. Det skal skrivast gruppekontrakt ved eksamensstart. Nærare retningsliner og vurderingskriterier blir gitt ved eksamensstart. Gruppa får ein felles karakter.

Del 2: Munnleg individuell prøve på 20 minutt. Studenten førebur ein presentasjon på 10 min+/- 10% basert på ei fagleg problemstilling, praktisk arbeid og erfaringar studenten har opparbeidd seg i emnet. Presentasjonen vert etterfølgd av ein fagleg samtale.

Dersom ei gruppe stryk, blir ny eksamen gjennomført ved næraste eksamensavvikling. Dersom ein student ikkje får fullført eksamen med si gruppe, kan han/ho ta gruppe-eksamen med ei ny gruppe ved næraste høve. Dersom dette ikkje let seg gjere, blir ny eksamen gjennomført som praktisk eksamen aleine.

Hjelpemiddel ved eksamen

Del 1: Alle hjelpemiddel er tillate

Del 2: Alle hjelpemiddel er tillate

Meir om hjelpemiddel