Hydrogenteknologi

Forskargruppa kombinerer eksperimentelle metodar, matematisk/fysisk modellering og tekno-økonomiske analysar innan låg- og høgtemperatur elektrolyse- og brenselcelleteknologi, både på celle- og systemnivå.

Vi har særleg fokus på yting, effektivitet og integrasjon i berekraftige energisystem. Gruppa deltek i samarbeid på regionalt, nasjonalt og internasjonalt nivå, og arbeider tett med sentrale aktørar i den norske hydrogenindustrien for å sikre at forskinga gir reelle bidrag til samfunn og næringsliv.

Viktige forskingsområder inkluderer: 

• Modellering og eksperimentell utvikling av låg-temperatur brenselceller
• Modellering av integrasjon av teknologiar for cracking (t.d. ammoniakk- og metanolreformering) og karbonfangst, i maritime framdriftssystem basert på PEM- og SOFC-teknologi
• Design, produksjon og testing av protonleiande, keramiske brensel- og elektrolyseceller, med fokus på avanserte metodar for materialsyntese, komponentproduksjon og karakterisering
• Hydrogenproduksjon frå variable energikjelder, inkludert tekno-økonomiske analysar av offshore hydrogenproduksjon frå vindkraft
• Nye metodar for produksjon av hydrogen frå sjøvatn

Gruppa har skaffa ekstern finansiering og er i gang med å vidareutvikle hydrogenlaboratoriet med fleire eksperimentelle oppsett. Vi samarbeider tett med ANCEHA-laboratoriet ved HVL, som gir tilgang til avansert utstyr for materialsyntese og -karakterisering.

Teamet vårt omfattar fleire ph.d.-stipendiatar og postdoktorar. Vi held jamlege forskingsmøte der både masterstudentar og ph.d.-studentar deltek. Desse møta fungerer som arenaer for å dele vitskaplege resultat, diskutere nye idear og ta opp sentrale tema som akademisk skriving og publisering.

Samarbeid og formidling

Gruppa samarbeider tett med både forskingsmiljø, offentlege styresmakter og næringsliv – regionalt, nasjonalt og internasjonalt. Vi deltek aktivt i den offentlege debatten gjennom kronikkar, podkastar, folkemøte og populærvitskapleg formidling.

Vi deltek i fleire større prosjekt, inkludert:

• FME HyValue – eit åtteårig forskingssenter for hydrogen, der HVL har ei sentral rolle i både leiing av arbeidspakker og i senterleiinga.
• H2CoVE (Erasmus+) – eit europeisk senter for fremragande hydrogenutdanning, der HVL er regional koordinator og ein av 19 partnarar som skal styrke hydrogenkompetansen i europeisk arbeidsliv.
• HERCHET - Higher Education and Research Collaboration on Hydrogen and Enabling Technologies -  finansiert av UTFORSK, med fokus på mobilitet og utvikling av utdanning og forsking innan hydrogenteknologi i Noreg og India.

Strategisk utvikling

Forskargruppa jobbar aktivt med nye søknadar om ekstern finansiering og er involvert i fleire pågåande initiativ – mellom anna ein EU-søknad knytt til etablering av ein Hydrogen Valley. Vi er også aktive i Hydrogen Europe Research, der vi bidreg i fleire faglege og tematiske arbeidsgrupper.

Gruppa har eit godt tverrfagleg samarbeid med andre forskingsmiljø ved HVL som arbeider innan hydrogenteknologi.

For meir informasjon om hydrogenaktivitetane ved HVL, sjå nettsida Hydrogen ved HVL. 

Forskargruppeleiar