MACREL-NO02 Norskprofil - emne II

Innhald og oppbygging

Den norskfaglege profilen innan master i kreative fag og læreprosessar er eit studium av tekst og arbeid med skaping og framføring av tekst. Tekstomgrepet omfattar munnlege og skriftlege tekstar, analoge og digitale tekstar og skjønnlitterære sjangrar og fagtekstar. Sentralt i studiet står teori om skaping og framføring av munnlege og skriftlege tekstar, og teoriar om tekstars resepsjon, analyse og tolking. Didaktiske tilnærmingar til tekstarbeid vil vera gjennomgåande i problemstillingar knytt til lese- og skriveopplæring, arbeid med litteratur, munnlege og performative uttrykksformer. Også i arbeidet med det munnlege, lesing og skriving som grunnleggjande ferdigheiter i andre fag vil didaktiske tilnærmingar vera gjennomgåande. Norskfaget sin plass i skulen, i samtidskulturen og i danningshistoria, og tekstarbeid med sikte på danning og oppøving i estetisk skjønn og kritisk vurdering vil vera eit sentralt tema i studiet. Kreativt arbeid med tekst vil bli tematisert. Tekststudium som forskingsemne, kjennskap til internasjonal forsking på tekst, og teori og metodar knytt til forsking på tekst vil stå sentralt.

 

Følgjande tema blir vektlagt:

• Teori om og arbeid med skriving av skjønnlitterære tekstar og fagtekstar
• Teori om tekstskaping
• Fagdidaktiske grunnlagsproblem og didaktiske tilnærmingar til arbeid med tekst
• Arbeid med tekstskaping, tekstformidling og tekstframføring
• Tekststudium som forskingsfelt, vitskapsteoretiske problemstillingar og metodar
• Utvikling av forskingsskisse

Læringsutbytte

Kunnskap:

Kandidaten har

• avansert kunnskap om litteraturteori med vekt på skjønnlitterære uttrykksformer og fagtekstteori
• inngåande kunnskap om litteraturdidaktikk og didaktisk arbeid med munnleg og skriftleg tekstskaping og formidling
• spesialisert kunnskap om ulike sider ved profesjonell og kunstnarleg produksjon og framføring av tekstar
• inngåande kunnskap om tekst som forskingsobjekt, vitskaplege tilnærmingar og forskingsmetodar basert på fagområdet si historie, tradisjon og eigenart og plass i samfunnet

Ferdigheiter

Kandidaten kan

• analysera og tolka kritisk skriftlege tekstar
• skapa og formidla tekstar med ulike uttrykksformer på ein sjølvstendig måte
• leggja til rette for elevars møte med forfattarar og profesjonelle utøvarar i undervisningssamanheng på ein sjølvstendig måte
• vurdera sjølvstendig forskings- og utviklingsspørsmål som er stilt i forskingsarbeid innan tekstforsking, og utforma forskingsskisse og forskingsspørsmål for eit masterarbeid i tråd med gjeldande forskingsetiske normer

Generell kompetanse

Kandidaten kan

• planleggja og leia arbeid med kreative skriveprosessar
• vera ein ressurs i fagleg samanhengar i spørsmål om tekstkunnskap
• utvikla eit forskingsprosjekt knytt til tekstkunnskap med omsyn til å utvikla relevante problemstillingar og forskingsspørsmål i tråd med gjeldande forskingsetiske normer

Krav til forkunnskapar

- Ingen

Tilrådde forkunnskapar

MACREL-NO01

Undervisnings- og læringsformer

Undervisninga vil vera samlingsbasert og nettstøtta. Læringsformene innanfor emnet er pregea av variasjon, og omfattar eigen estetisk utforskning og produksjon, førelesinger, fellesdrøftingar, seminar, gruppeprosjekt med rettleiing, ulike former for individuelt arbeid med rettleiing, og bruk av nettbaserte ressursar. Kreativ skaping og analytisk tilnærming pregar emnet. Arbeidskrav vil inngå i arbeidet med emnet. Skriving av skjønnlitterære tekstar og formidling og framføring av munnlege tekstar kan inngå i studiet.

Obligatorisk læringsaktivitet

Årsplanen/semesterplanen gir detaljert informasjon om studiekrav som må oppfyllast for å få vurdering i emnet. Dette kan vera:

• deltaking i førelesingar, seminar og samlingar, og felles drøftingar på studiestaden og på nett
• innlevering av tekstar og oppgåver, rapportar og refleksjonsnotat, og framføring og formidling av munnlege tekstar.
• Deltaking i prosjektarbeid, presentasjonar og rettleiing.

Vurderingsform

Praktisk-metodisk eksamen

Karakterskala A-F

Hjelpemiddel ved eksamen

Alle trykte og skrivne hjelpemidlar

Meir om hjelpemiddel