LUPEGP300 Praksis 3.år

Innhald og oppbygging

Praksis er ein integrert del av faga i utdanninga og skal bidra til at studentane utviklar evne til å reflektere over og utvikle eiga profesjonsutøving.

Emneplanen gjeld studentar som har valt emne frå grunnskulelærarutdanninga.

Praksisemnet består av 20 dagar praksis i grunnskulen i haustsemesteret. I tillegg skal studentane delta på praksisførebuande dag før praksisperioden. Studentane skal gjere seg kjent med retningslinjene for praksisstudiet (nettsidene for praksis) i grunnskulelærarutdanninga.

Studentane skal ha fokus på å vidareutvikle eigen læraridentitet, utvikling av gode læringsmiljø, tilpassa opplæring, vurdering, relasjonskompetanse og leiing av undervisning.

Studentane skal åleine og saman med praksisgruppa, praksislærar og faglærar frå HVL planlegge, gjennomføre og vurdere undervisning.

Praksis kan føregå på enkelte andre dagar/kveldar i samband med planleggingsdagar, foreldremøte, elevsamtalar, foreldresamtalar, aktivitetsdagar, ekskursjonar m.m.

I praksis inngår ulike arbeidsformer i tillegg til planlegging og gjennomføring av eigen og andre sin undervisning/aktivitet. Døme på andre arbeidsformer kan vere observasjonsoppgåver, gje/ta imot kollegarettleiing, utforme refleksjonsnotat, halde innlegg/framlegg, delta på foreldremøte og lærar-/personalmøte.

Læringsutbytte

Ved fullført emne skal studenten ha følgjande totale læringsutbytte:

Kunnskapar

Studenten

• har kunnskap om læring, læreprosessar, arbeidsmåtar, læremidlar og vurderingsformer som særpregar dei ulike undervisningsfaga
• har kunnskap om korleis ulike nasjonale og lokale satsingsområde kan ha betydning for styrking av elevane si læring
• har kunnskap om tilpassa opplæring og utvikling av gode læringsmiljø
• har kunnskap om skulen sitt lovverk og barn si rett til medverknad
• har kunnskap om utvikling av undervisning, og pedagogisk og didaktisk tilrettelegging i ei mangfaldig elevgruppe

Ferdigheiter

Studenten

• kan vere ein tydeleg leiar og leie læringsarbeid for ulike elevar, samt rettleie i profesjonsfellesskap
• kan identifisere åtferd som er utfordrande for elevane si læring og drøfte måtar dette kan handterast på
• kan åleine og saman med andre planlegge, gjennomføre og vurdere undervisning med utgangspunkt i lokale og nasjonale planar
• kan legge til rette for og reflektere rundt tilpassa opplæring for ei mangfaldig elevgruppe

Generell kompetanse

Studenten

• kan drøfte undervisning, læring og fag i lys av aktuelle læreplanar og profesjonsetiske perspektiv
• kan reflektere over eigen læraridentitet, kommunikasjons- og relasjonskompetanse
• kan opptre profesjonelt og rette seg etter gjeldande normer, reglar og lover i arbeidslivet

Krav til forkunnskapar

• LUPEKP100 Praksis 1.år kroppsøving og idrettsfag
• LUPEKP200 Praksis 2.år kroppsøving og idrettsfag

Undervisnings- og læringsformer

Studenten skal utarbeide eit refleksjonsnotat med eigne læringsmål før praksisperioden basert på læringsutbytteformuleringane i emneplanen. Notatet skal innehalde refleksjon over læringsmåla og forventningar til eiga læring, medstudentar, praksislærar og praksisskule. Dokumentet skal leverast til praksislærar på praksisførebuande dag før praksisperioden.

Når studenten har ansvaret for ei undervisningsøkt, skal studenten lage eit planleggingsdokument åleine eller i samarbeid med medstudentar. Dokumentet skal leverast til praksislærar i god tid før undervisninga slik at studenten kan få rettleiing før undervisningsøkta. Rettleiing etter gjennomført undervisning skal innehalde refleksjon og evaluering av undervisningsøkta.

Studenten følger arbeidsdagen og arbeidsoppgåver til praksislærar eller andre tilsette på praksisskulen så langt det er mogleg, inkludert teamarbeid, inspeksjon i friminutt, møte og skule-heim-samarbeid. I tillegg skal studenten observere når praksislærar og medstudentar underviser og bli trekt inn som medlærar når andre har undervisningsansvaret, for eksempel ved gruppedeling eller i elevrettleiing. Det oppfordrast til at studenten skriv dagleg logg over observasjonar og refleksjonar, som kan danne grunnlag for rettleiing.

Studenten skal utarbeide sjølvevaluering som leverast til praksislærar til sluttsamtalen i praksisperioden.

Studenten skal evaluere praksisperioden etter avslutta praksis.

Obligatorisk læringsaktivitet

Ingen

Vurderingsform

Obligatorisk 20 dagar rettleia og vurdert praksis med krav om 100% oppmøte.

Karakterskala: Bestått/Ikkje bestått.

Etter avslutta praksis skriv praksislærar ei individuell skriftleg sluttvurdering til studenten.

Studenten kan ikkje klage på vurderingsresultat i praksis. Dersom praksis ikkje er bestått, kan studenten gjennomføre andre forsøk neste gong emnet går ordinært. Dette kan påverke studenten sin studieprogresjon.

Hjelpemiddel ved eksamen

.

Meir om hjelpemiddel