Hopp til innhald
English

BSSN801 Barns språkutvikling og språkæring, nettbasert

Emneplan for studieåret 2026/2027

Tidlegare studieår

Innhald og oppbygging

Formålet med vidareutdanninga "Barns språkutvikling og språklæring" er å styrke kompetansen til barnehagelæraren i arbeidet med gode språkmiljø for alle barn, inkludert barn med forsinka språkleg utvikling og språkforstyrringar og fleirspråklege barn. Studiet er på masternivå. Rammeplanen sine føringar om mangfald, likeverd, likestilling, inkludering, tidleg innsats og livsmeistring vil liggje til grunn for studiet. Utdanninga vil ha fokus på leiing av arbeid med språk og språkmiljø i barnehagen.

Tema:

  • Barns språklege utvikling
  • Fleirspråkleg utvikling
  • Barn med språk- og kommunikasjonsforstyrringar i barnehagen
  • Kartlegging og observasjon av språkutvikling og barnehagens språkmiljø
  • Språkstimulering i barnehagen gjennom leik, høgtlesing og samtale i formelle og uformelle læringssituasjonar

Læringsutbytte

Ved fullført emne skal studenten ha følgjande totale læringsutbytte:

Kunnskapar

Studenten

  • har grundig innsikt i barns språkutvikling, inkludert fleirspråkleg utvikling
  • har grundig kunnskap om kva som er eit godt språkmiljø i barnehagen
  • har god kunnskap om korleis barn inngår i språklege samspel i barnehagen
  • har inngåande forståing om leiken sin verdi for barns språkutvikling, for meistring og inkludering
  • har god kunnskap om språkforstyrringar hos barn

Ferdigheiter

Studenten

  • kan kartlegge og observere barns språkutvikling og bruke kartlegging som grunnlag for systematisk arbeid og kritisk refleksjon rundt arbeid med barns språkutvikling
  • kan bruke samtale, barnelitteratur, musikk, rim og reglar og andre kulturuttrykk for å stimulere til barns språkutvikling, og vise progresjon i språkstimulerande aktivitetar

Generell kompetanse

Studenten

  • har grundig innsikt i verdien av språkstimulering i barnehagen og betydninga av tidleg innsats
  • har innsikt i tilhøve som legg rammer for leiing av endrings- og utviklingsprosessar og kunne reflektere kritisk rundt dei
  • kan kritisk vurdere barnehagelærarens rolle som språkmodell og fagleg didaktisk arbeid knytt til fagområdet kommunikasjon, språk og tekst

Krav til forkunnskapar

Ingen

Undervisnings- og læringsformer

Studiet går over to semester og er eit reint nettbasert studium med 10 nettsamlingar à to timar per semester. Studiet kombinerer førelesingar, diskusjonar, oppgåvearbeid, studentpresentasjonar og basisgruppearbeid. Mellom samlingane skal studentane arbeide i nettbaserte studiegrupper, i tillegg til sjølvstudium. Studiet stiller krav til den enkelte student om sjølvstendig arbeid og aktiv tilnærming til problemstillingar, samt at ein aktivt søkjer kunnskapsutvikling og samarbeid med andre studentar.

HVL brukar læringsplattforma Canvas og nettkonferanseverktøy. Studentane vil få ei innføring i bruken av nettkonferanseverktøy.

Obligatorisk læringsaktivitet

Følgjande obligatoriske læringsaktivitetar må vere godkjente for at studenten kan gå opp til eksamen. To av aktivitetane skal ta utgangspunkt i utvikling av eigen praksis:

  1. Ein rapport frå eit lite FoU-prosjekt på eigen arbeidsplass, der studenten knyttar praksis og teori, og får øving i prosjektleiing av endrings- og utviklingsarbeid.
  2. Ein munnleg presentasjon av rapporten.
  3. Eit refleksjonsnotat knytt til kunnskapsdeling i eige kollegium i barnehagen etter utprøving av didaktisk arbeid knytt til Rammeplanen sitt fagområde Kommunikasjon, språk og tekst. Her skal studenten planleggje og gjennomføre høgtlesing som språkstimulering, der barneboka blir utgangspunkt for samtale og utforsking.
  4. Ein fagtekst med utgangspunkt i analyse av ein forskingsartikkel med tema språkforstyrring eller kommunikasjonsvanskar i barnehagen. Her skal studenten presentere hovudmomenta frå artikkelen og knyte det til pensum og eigne erfaringar frå barnehagen. Eit av føremåla er at studenten får grundig innsikt i verdien av språkstimulering i barnehagen og betydninga av tidleg innsats.
  5. Eit digitalt arbeid i gruppe om fleirspråkleg utvikling og korleis ein kan støtte barn si språkutvikling. Studentane skal ha ei fagleg samtale der målgruppa/mottakaren er andre barnehagelærarar. Her får studentane utveksle erfaringar frå ulike barnehagar og sett dette i samanheng med faglitteratur.

Dei obligatoriske læringsaktivitetane må vere godkjende av emneansvarleg seinast to veker før studenten kan framstille seg til eksamen. Dersom ein obligatorisk læringsaktivitet blir vurdert som ikkje godkjend, skal det bli gitt ei grunngjeving for dette. Studentar som ikkje får godkjend ein obligatorisk læringsaktivitet vil, så langt det let seg gjere innan fastsette fristar, få eit nytt forsøk i inneverande semester.

Vurderingsform

  • Del 1: Heimeeksamen over tre dagar (tel 50 % av endeleg karakter).
  • Del 2: Individuell munnleg eksamen - om lag 30 minutt (tel 50 % av endeleg karakter).

Karakterskala A-F, der F svarar til ikkje bestått.

Begge delane må vere bestått for å få karakter i emnet. Ved ikkje bestått på ein av delane, kan den delen takast opp att åleine.

Hjelpemiddel ved eksamen

Meir om hjelpemiddel