TPHR590 Masteroppgåve

Innhald og oppbygging

I dette emnet skal studentane utføre eit sjølvstendig forskingsarbeid med relevans for fagfeltet psykisk helse-, rus- og avhengigheitsarbeid. Masteroppgåva kan innebere eigen innsamling av empirisk materiale, eller bruk av på førehand innsamla data. Masteroppgåva, inkludert prosjektplan, vert i utgangspunktet skrive som eit fellesprosjekt mellom to studentar. Det er også mogleg å skrive oppgåva individuelt dersom det, av faglege eller praktiske grunnar, er det mest føremålstenlege.

Masteroppgåva er eit forskingsprosjekt der formålet er eit eller fleire av følgjande punkt:

• tilføre ny kunnskap til fagfeltet psykisk helse-, rus- og avhengigheitsarbeid
• betre kvaliteten av eksisterande praksis
• oppsummere eksisterande kunnskap for å skaffe ei betre forståing av eit avgrensa tema og skape retning for framtidig forsking og praksis

I prosjektplanen skal studentane velje eit tema og ei problemstilling som er relevant for fagområdet, og som er i tråd med emneplanen for masteroppgåva. Prosjektplanen inngår som eit arbeidskrav i det første semesteret av emnet og må vere godkjend før studentane startar på sjølve masteroppgåva.

Masteroppgåva skal skrivast i tråd med  Reningslinjer for masteroppgåva ved Fakultet for helse- og sosialvitskap (FHS) - Høgskulen på Vestlandet (hvl.no). Før arbeidet med oppgåva tar til skal studentane og rettleiar(ar) utarbeide ein rettleiingsavtale i tråd med HVL sine retningslinjer. Studentane fyller ut rettleiingsavtalen og sender denne til rettleiar så tidleg som mogleg etter at tema og metode for masteroppgåva er valt. Studentane, rettleiar og eventuelle medrettleiarar skal signere avtalen, og studentane skal sende den til emneansvarleg.

Læringsutbytte

Ein student med fullført emne skal ha følgjande totale læringsutbytte definert i kunnskap, ferdigheiter og generell kompetanse:

Kunnskap: Studenten...

• har avansert kunnskap om fagfeltet psykisk helse-, rus- og avhengigheitsarbeid sitt vitskapsteoretiske, teoretiske og metodiske grunnlag, og kan nytte desse innanfor fagområdet
• har inngåande kunnskap om kvalitetsvurdering av forsking
• har inngåande kunnskap om ulike forskings- og analysemetodar
• har spesialisert innsikt i det temaet masteroppgåva handlar om

Ferdigheiter: Studenten...

• kan vurdere kva som er tenleg design, datainnsamlingsmetode og analysemetode utifrå valt problemstilling
• kan bruke relevante metodar for forsking og fagleg utviklingsarbeid på ein sjølvstendig måte
• kan formidle eiga og andre si forsking presist og tydeleg
• kan gi konstruktive innspel i eigen og andre sine forskingsprosessar
• kan reflektere over og ta omsyn til forskingsetiske problemstillingar knytt til forsking på sårbare grupper

Generell kompetanse: Studenten...

• kan planlegge, gjennomføre og dokumentere eit sjølvstendig, avgrensa forskingsprosjekt under rettleiing og i tråd med gjeldande forskingsetiske normer og gjeldande krav til personvern
• kan kommunisere om faglege problemstillingar, analysar og konklusjonar innanfor fagområdet, kritisk vurdere kjeldene, bidra til nytenking og gjennomføre forsking i praktisk virke

Krav til forkunnskapar

For å kunne levere masteroppgåva må emna TPHR501, TPHR502, TPHR503 og TPHR504 vere bestått, samt at obligatoriske læringsaktivitetar i emnet MAMET1PHR må vere godkjent.

Tilrådde forkunnskapar

Ingen

Undervisnings- og læringsformer

Emnet er samlingsbasert og kombinerer digital og fysisk undervisning. Kvart semester er det to fysiske samlingar. Ei av desse samlingane vert ei fysisk fellessamling i Bergen, og den andre blir gjennomført parallelt i Bergen og Sogndal forutsett at eit tilstrekkeleg tal studentar ønskjer Sogndal som studiestad. Rettleiing gjennomførast etter avtale, fysisk eller digitalt.

I masteremnet arbeider studentane sjølvstendig med ein tematikk innanfor psykisk helse-, rusmiddel-, og avhengigheitsarbeid. Det blir nytta varierte læringsformer som studentpresentasjon, rettleiing, seminar, førelesningar og sjølvstudium.

Studentane skal lage ein detaljert og konkret plan for gjennomføringa av masterprosjektet. Prosjektplanen skal vere på inntil 2000 ord (eksklusiv referansar), og innehalde følgjande:

• Tittel på masteroppgåva
• Bakgrunn som inneheld avklaring av sentrale omgrep, aktuell forsking og evt. teori
• Problemstilling
• Metode
• Tidsplan
• Referanseliste

Prosjektplanen skal godkjennast av rettleiar før arbeidet med masteroppgåva tar til.

Rettleiar blir tildelt etter at studentane har valt emne for masteroppgåva og er komen i gang med utforming av prosjektplanen. Studentane skal gjennomføre minimum 5 timar rettleiing (inkl. til prosjektplan) i tillegg til rettleiing i gruppe saman med andre studentar og på seminar. Studentane må levere skriftleg materiale til rettleiar før møter, etter nærare avtale med rettleiar.

Obligatorisk læringsaktivitet

Følgjande obligatoriske læringsaktiviteter og arbeidskrav må vere godkjende før studentane kan levere masteroppgåva:

1. Til stades 80% på samlingar som omfattar ulike studentaktive læringsformer som framlegg av eiget arbeid, drøfting av medstudentar sitt arbeid, rettleiing, gruppearbeid, verkstader og liknande.
2. Prosjektplan for masteroppgåve på inntil 2000 ord (eksklusiv referansar) i tråd med denne emneplanen og Retningslinjer for masteroppgåve ved FHS
3. Framlegg av forskingsmetode, inkludert datainnsamling og analyse, som er valt for masteroppgåva.
4. Gjennomføre minimum fem timar med rettleiing. Rettleiinga skal skje i tråd med Retningslinjer for masteroppgåva ved FHS. Minst ei av rettleiingstimane skal omhandle oppgåva i si heilskap.

Vurderingsform

Masteroppgåva kan skrivast på eit skandinavisk språk eller på engelsk etter avtale med rettleiar.

Studentane kan velje følgande to alternativ når det gjeldt forma på masteroppgåva:

Alternativ 1: Monografi med eit omfang på 15.000 ord +/- 10 %. Tittelside, innhaldsliste, referanseliste og eventuelle vedlegg kommer i tillegg.

Alternativ 2: Vitskapeleg artikkel som følgjer forfattarrettleiing og tilfredsstiller kvalitetskrava til eit fagfellevurdert nasjonalt eller internasjonalt tidsskrift. Masteroppgåva skal da bestå av ei utdjuping på inntil 7500 ord +/- 10%, i tillegg til artikkel som svarer til tidsskriftet sine retningslinjer.

I begge alternativa må studentar som skriv i par gjere greie for deira individuelle bidrag i arbeidet med oppgåva.

Masteroppgåva skal utformast systematisk, for eksempel etter IMRAD-struktur.

Vurderingsuttrykk

Gradert karakterskala A til F, der A til E er beståtte karakterar og F er ikkje bestått.

Ny eksamen

Ved ikkje bestått (karakter F) leverer studentane bearbeidd, skriftleg utgåve til ny eksamen i påfølgande semester.

Det er ikkje mogeleg å levere ny eller revidert masteroppgåve ved bestått resultat.

Hjelpemiddel ved eksamen

Alle hjelpemiddel er tillatne. For meir informasjon om bruk av kunstig intelligens sjå https://www.hvl.no/kunstig-intelligens/rettleiingar/ og Innlevering av heimeeksamen og oppgåver - Høgskulen på Vestlandet (hvl.no)

Meir om hjelpemiddel

Meir om hjelpemiddel