Engelsk 2 | 5.-10. trinn | nettbasert
Etter- og vidareutdanning
Studietilbodet Engelsk 2, 5-10 (30 studiepoeng) gjev vidareutdanning i engelsk for lærarar. Studiet er i hovudsak for deg som undervisar på mellom- og ungdomstrinnet og som har 30 studiepoeng i engelsk frå tidlegare.
Engelsk 2 byggjer på Engelsk 1. Studiet har to emne, kvart på 15 studiepoeng, som byggjer på kvarandre. Emne 1 vert undervist i haustsemesteret og emne 2 i vårsemesteret.
Du finn meir informasjon i emneplanane:
- ENU803N Engelsk 2, emne 1 - Kommunikasjon i språk, tekst og kultur
- ENU804N Engelsk 2, emne 2 - Mangfald i språk, tekst og kultur
Kva lærer du?
- Du får større innsikt i språkopplæring, fagkunnskap og fagdidaktikk på mellom- og ungdomstrinnet.
- Studiet omfattar òg vidareutvikling av språkferdigheit og tekstkompetanse, og gjev deg ei innføring i eit rikt og variert utval tekstar, både til vidare personleg og fagleg vekst og til bruk i undervisning på mellom- og ungdomstrinnet.
- Du får djupare kunnskapar om grammatisk og fonologisk struktur i det engelske språket.
- Studiet fokuserer på kva som kjenneteiknar elevar på dei ulike trinna og deira språkutvikling.
- Du lærer òg om temaa kommunikasjon, språkleg og kulturelt mangfald, vurdering og utvikling av digitale ferdigheiter i engelskfaget.
Praktisk informasjon
Undervisningsform og studietur
Studiet er nettbasert og har undervisning ein gong i veka. All undervisning er på engelsk.
Nettundervisninga består av forelesningar, presentasjonar, seminar og gruppeinndelte økter. Undervisninga kan være både synkron og asynkron.
Me nyttar læringsplattforma Canvas og konferanseverktøyet Zoom til kommunikasjon med studentane.Du vil få tilgang til Canvas med meir informasjon før studiestart.
Praktisk erfaring frå yrket ditt vert trekt inn i emnet, og det er eit mål at du skal tilføre skulen du underviser på, oppdatert fagleg og didaktisk kompetanse.
I studiet inngår tilbod om ei vekes tur til Det norske studiesenteret i York. Turen er ein del av undervisninga i emne 2 om våren, men er ikkje obligatorisk. Du må sjølv dekkje reiseutgifter, opphald og kursavgift. Dersom du ikkje kan delta, får du tilbod om eit alternativt opplegg. Sjå: https://www.york.ac.uk/nsc/short-courses/
Timeplan
Nettundervisning på torsdagar kl. 13.30–15.30.
Vurderingsform
- Emne 1: Deleksamen – heimeeksamen og skriftleg kunnskapsprøve
- Emne 2: Deleksamen – semesteroppgåve og munnleg kunnskapsprøve
Alle deleksamenar er nettbaserte. Informasjon om arbeidskrav finn du i kvar enkelt emneplan.
Pensum
Pensumlista for haustsemesteret vert publisert på hvl.no 1. juli.
