MGBKH241 Kunst og handverk 1, emne 2 - Grunnleggjande innføring i kunst og handverk 2

Innhald og oppbygging

Kunst og handverk 1 emne 2 gir ein ytterlegare innføring i kunst, design og arkitektur. Studenten skal få erfaring med varierte arbeidsmetodar og med handverk i ulike material og medium knytt til gjeldande læreplan for grunnskulen. Emnet vektlegg arbeid med handverk, material, reiskap og teknikkar. Leik, ferdigheitstrening og utforsking står sentralt. Material, fargar, former og digitale uttrykk tilarbeidast med metodar og verktøy tilpassa ulike trinn. Fagdidaktikk og profesjonspraksis er ein integrert del av studiet. Undervisninga tar opp skulefaget sin historie fram til i dag og legitimerer det som allmenndannande.

Studiet førebur studenten på sitt yrke med praktiske øvingar relatert til faget sin vitskaplege perspektiv og metodar. Eigne erfaringar og kunnskap i faget skal utvikle studentane til gode rettleiarar for elevane sine skapande prosessar og gi kunnskap i lærings- og støttestrategiar som fremmer elevane si faglege utvikling.

Emneplanen følgjer progresjonen i praksis og i dei fagovergripande tema slik det går fram av studieprogramplanen og emneplanen for praksis for det aktuelle året. Studenten betalar materialpengar (sum framgår ved semesterstart)

Læringsutbytte

Ved fullført emne skal studenten ha følgjande totale læringsutbytte:

Kunnskap

Studenten

• har grunnleggjande kunnskap om relevante materiale, teknikkar, verktøy og estetiske verkemiddel
• har grunnleggjande kunnskap om korleis analoge og digitale uttrykksformer innanfor handverk, design, arkitektur og kunst kan tolkast og brukast som utgangspunkt for barn og unge sine skapande arbeid
• har kunnskap om barn og unge sine to- og tredimensjonale ytringsformer med tilhøyrande teoriar om estetiske læringsprosessar, oppleving, leik og kreativitet
• har kunnskap om korleis ulike medium kan brukast til formidling og fagleg oppdatering
• har erfaringsbasert kunnskap om utforskande arbeidsmetodar i faglege tema.

Ferdigheiter

Studenten

• kan arbeide målretta med idéutvikling, dokumentasjon og vurdering av eigne skapande prosesser
• kan analysere og formidle mangfaldet i lokal og global kunst- og formkultur på varierte måtar
• kan formidle val av inspirasjonskjelder, arbeidsmetode, verkemiddel, material, teknikkar, verktøy og læremiddel
• kan bruke og vedlikehalde relevante verktøy, apparat og maskiner, og ta ansvar for arbeidsmiljø og sikkerheit på verkstadane (HMS-rutinar)
• kan bruke teikning både som språkform og som verktøy i skissearbeid, ideutvikling og arbeidsteikningar i gitt målestokk
• kan bruke faget sitt innhald, arbeidsmåtar og teori i undervisningsplanlegging, gjennomføring og læringsorientert vurdering.
• kan organisere utstillingar av elevarbeid og på andre måtar synleggjere faget på ulike arenaer

Generell kompetanse

Studenten

• kan legge til rette for barn og unge sitt skapande arbeid med material som utfordrar sansar, engasjerer følelsar, krev konsentrasjon og aktiviserer kroppen
• kan utnytte elevmangfaldet som utgangspunkt for tilpassa opplæring
• forstår korleis val av materiale, arbeidsformer og tema kan bidra til gjenbruk, vedlikehald og omtanke for miljøet
• kan samarbeide og kommunisere med andre fag om utvikling av fleirfaglege prosjekt samt generere tverrfaglege, vitskaplege og utforskande arbeidsformer

Krav til forkunnskapar

Ingen

Tilrådde forkunnskapar

MGBKH141 Kunst og handverk 1, emne 1 - Grunnleggjande innføring i kunst og handverk 1

Undervisnings- og læringsformer

Emnet krev i stor grad at ein deltek fysisk på sin campus (høvesvis Bergen og Sogndal)

• Praktisk arbeid i verkstadane, individuelt og i grupper (fysisk)
• Førelesingar (fysisk og digitalt)
• Rettleiing (i hovudsak fysisk, men ved behov kan den gjerast digitalt)
• Seminar
• Prosjektarbeid
• Munnlege og skriftlege oppgåver
• Ekskursjonar. Det er høve til å søkje om kompensatorisk arbeidskrav for ekskursjonar i samråd med faglærar.

Obligatorisk læringsaktivitet

• Deltaking i obligatoriske læringsaktivitetar
• Eit munnleg framlegg i gruppe

Dei obligatoriske læringsaktivitetane må vere godkjende av emneansvarleg seinast 2 veker før studenten kan framstille seg til eksamen. Dersom ein obligatorisk læringsaktivitet blir vurdert som ikkje godkjend, skal det bli gitt ei grunngjeving for dette. Studentar som ikkje får godkjend ein obligatorisk læringsaktivitet vil, så langt det let seg gjere innan fastsette fristar, få eit nytt forsøk i inneverande semester.

Vurderingsform

Vurderingsmappe.

Ei mappe som inneheld både skriftlege og praktiske arbeid. De praktiske arbeida består av utforsking og produkt innan ulike materialkategoriar. Det skriftlege arbeidet består av prosessdokumentasjon og fagleg refleksjon om arbeida i ein skulesamanheng.

Det praktiske arbeidet skal stillast ut og vert vurdert saman med det skriftlege arbeidet.

Karakterskala A-F, der F svarar til ikkje bestått.

Ved ikkje bestått skal det leverast ei omarbeida vurderingsmappe til ny eksamen.

Hjelpemiddel ved eksamen

Alle hjelpemiddel er tillate.

Meir om hjelpemiddel